UVALO NGOMALUGAJU EMASIMINI
ILENGELA engozini yokubhuqwa yindlala imindeni esezindaweni ezigudle umfula uPhongolo, KwaMhlabuyalingana, njengoba abesifazane bakhona abaziphilisa ngokulima sebesaba ukuya emasimini ngenxa yezigameko zokuhlaselwa kwabo, badlwengulwe ngowesilisa ongaziwa endaweni.
Kuthiwa lo malugaju akazifihli nokuzifihla uma eyogila lo umkhuba kwabesifazane baseWelcome, Kwamadonela naKwaShukela eJozini.
Kubikwa ukuthi bawu-9 abantu asebehlaselwe yilo mlisa, kubalwa nomfelokazi ohlala yedwa, amgile ebuya emasimini.
Lo mfelokazi kuthiwa udlwenguliwe, washaywa kabuhlungu yilo malugaju. Isigameko sakamuva senzeke ngoLwesithathu lapho ebambe khona isalukazi (57), saseWelcome, esihlala nabazukulu baso esibakhulisa ngokulima izimoba.
Kuvela ukuthi usibambe sisemasimini.
Ungenele nomfelokazi osemusha, okubikwa ukuthi umhlasele elele endlini kodwa wangaphumelela ukumdlwengula, kodwa wamgwaza amanxeba amane emzimbeni.
Zehle mi izinyembezi kulesi salukazi saseWelcome - esingeke sisidalule ukusivikela - esigilwe yilo malugaju ngesikhathi sinekela ILANGA ngokusehlele.
“Selokhu nje ngivelelwe yile nkinga, kangisaphumi nokuphuma lapha ekhaya. Lo muntu uqhamuke nje esithubeni wangabuza mkhuhlane. Ungiyalele ukuba ngikhumule zonke izimpahla kodwa ngenqaba.
“Bese ngike ngezwa ukuthi kunomuntu wangaphesheya komfula (KwaShukela) esinaye lapha emasimini, okuthiwa ubanjwe yisigebengu khona lapha emfuleni samdlwengula. Lapha eduze komfula ngilima ngesizathu sokuthi ngifuna ukukhulisa, ngifundise abazukulu bami,” kusho isisulu.
Umphakathi wakule ndawo unovalo nangezingane zawo eziwela nsuku zonke kulo mfula uma ziya noma sezibuya eWelcome Primary School naseMadone- la Primary School.
Okhulumela amaphoyisa KwaZulu-Natal, uCapt Thembeka Mbhele, uthe kunabesifazane ababili abaneminyaka ephakathi kuka-50-60 abavule amacala okunukubezwa ngokocansi.
Uthe amaphoyisa aphansi phezulu kulezi zindawo ngenhloso yokuqinisekisa ukuphepha komphakathi.
“Sinxusa umphakathi ukuba ubike emaphoyiseni izigameko zokuhlukunyezwa kwawo. Kasinalo ulwazi oluphelele ngabantu abangu-9 abadlwenguliwe kule ndawo ngaphandle kwalaba ababili abavule amacala okunukubezwa besemasimini abaziphilisa ngokulima kuwo eduze komfula,” kusho uCapt Mbhele.