UQHAMUKE NOHLELO LOKUFUKULA ABASAFUFUSA USOMAHLAYA
BAZOLUQHUMISA ekhaya elisha uhleko abathandi bamahlaya baseThekwini namaphethelo njengoba uTsoro the Comedian - ongomunye wosomahlaya abadumile KwaZulu-Natal - ezoqala uhlelo lwakhe, iComedy in Comedy, eProtea Hotel, kuleli dolobha ngoLwesihlanu ngo-18h00.
La mahlaya azokuba kule ndawo njalo emuva kwezinyanga ezimbili. UTsoro ungomunye wosomahlaya abanandisa kwiMzansi Comedy edlala kuMzansi Magic (161) njalo ngoLwesithathu ngo-20h00.
Phakathi kosomahlaya okulindeleke babonakale kwiComedy in Comedy, nguSimphiwe Shembe naye onohlelo lwakhe lwamahlaya eBat Centre, uNonto R ongusomahlaya wesifazane, Amawele aseChesterville noMomesh.
UTsoro uthe: “Sifuna amahlaya abesezingeni elifana ncamashi nemicimbi yomculo, lapho kungapheli khona inyanga ungatholanga idili lomculo. Sifuna nokukhuphula ozakwethu abasebasha kulo mkhakha.
“Thina sisizwe yi-99% Zulu Comedy ukuze sifike kuleli zinga kanti bonke ozakwethu ebesinabo endimeni sebezakhele igama elihle futhi banezinhlelo ezahlukene zamahlaya, ngakho iProtea Hotel izothola ithuba nayo lokuthokozisa izivakashi uma ziseThekwini," kusho uTsoro.
Amathikithi atholakala ngokushayela uTsoro ku: 072 509 7203 kanti amanye azotholakala emnyango ngo-R120 lilinye.