Uzimisele ngokuya emkhathini
Ukushonelwa yingane kumkhuthazile ukuba afunde kakhulu
NAWE Nongoma kawumncinyane! Lawa ngamazwi akufikela kuqala uma ukhuluma nentokazi enguSenamile Masango (31), eyenza izifundo zokuba yiNuclear Scientist, engeyaseTshodo, KwaNongoma.
UNkz Masango uthi ngesikhathi eqeda imfundo yamabanga aphezulu eMlokothwa High School, KwaNongoma, ubenesifiso sokuba abe ngowesifazane wokuqala wase-Afrika ukuya emkhathini.
Uthi ngo-2002 ngesikhathi usomabhizinisi waseNingizimu Afrika, uMnu Mark Shuttleworth, eba ngowokuqala waseNingizimu Afrika noma wase-Afrika ukuya emkhathini, lokhu kwamphatha kabi.
“Namanje ngisazizwa sengathi uMark wathatha iphupho lami,” kusho yena ehleka.
Le ntokazi, eqede isikole ineminyaka ewu-16 - kwadingeka ukuba iye enyuvesi ngaleso sikhathi - ithi kube nesiphithiphithi esikhulu uma sekufanele iyofunda ngoba uyise akathandanga ukuba iye ezikhungweni zemfundo ephakeme ezikude ngoba ibisencane kakhulu.
UNkz Masango, ozalwa nguMntwana Joyce Masango kodwa wakhuliswa yinkosikazi kayise yesibili, uMaNkosi, uthi ukhulele emndenini othanda kakhulu imfundo kanti uyise ubengumhloli owaziwayo KwaNongoma namaphethelo, enamakhosikazi amathathu, wonke abengothishela.
“Imfundo yinto esikhule ngayo ekhaya. Bonke abantu bakithi bafundile kodwa bafundele ubuthishela, okuyinto engikhule ngazi kahle ukuthi ngeke ngiyifundele. Ngikhule ngivele ngingumuntu ongathandi ukwenza into eyenziwa ngabanye abantu, ngithanda ukwehluka, okuyinto eyenze ngenza iziqu zobunjiniyela,” kusho yena.
Uqede umatikuletsheni wayofunda e-University of Zululand, KwaDlangezwa, eMpangeni, lapho efunde khona engathandisisi kahle.
“Nganginokuthi ubaba ufunde kuyona le nyuvesi esemdala, ngakho-ke ngangicabanga ukuthi ngiyofunda khona nabantu abadala. Ngangifuna ukuyofunda emanyuvesi akude,” kusho yena efa yinsini.
Njengoba ekhulele emndenini obunesandla esiqinile begadwa, uthi ukufika enyuvesi kuyena bekusho inkululeko, okuyilapho enze khona inqwaba yamaphutha okuholele ekutheni angaphumeleli kwezinye izifundo, waphinde wakhulelwa kwadingeka ukuba ake ayohlala ekhaya akhulise ingane.
“Ngenze amaphutha amaningi, ngaphoxa abazali bami, ikakhulukazi ubaba owayegqugquzela kakhulu ukuba sifunde kanti nami ngikhule ngibukela kuyena njengomuntu obeyithanda imfundo.
“Nasendaweni ubaba ubegqugquzela abantu abasha ukuba bathande imfundo. Ngihlale ngisho ngithi njengoba engasekho emhlabeni, ifa asishiye nalo sisalidla namanje ngoba imali yakhe uqinisekisile ukuthi usikhokhela ngayo ezikhungweni zemfundo ephakeme safunda,” kusho uNkz Masango.
Uthi uyise udlule emhlabeni ngaphambi kokuba ithwale iziqu, kodwa okuyijabulisile wukuthi ubesenolwazi lokuthi iphumelele. Noma kuzwakala sengathi izinto zale ntokazi zibe sezibheka phezulu unomphelo ngemuva kokuthola iziqu, kepha ngo-2016 kudlule emhlabeni indodakazi yayo, uSindisiwe, ebiwuzinyobulala, engozini yemoto. Ithi-ke ukudlula kwayo kuyiphathe kabi kakhulu, yakhetha ukusebenzisa lezo zinhlungu ukuzimisela esikoleni, esefunda e-University of Western Cape (lapho esafunda khona namanje).
UNkz Masango thi usizwe ngamalecturer akhe eWestern Cape nabangani afike wabathola eCape Town, bamesekile. Uthi ngezinye izinsuku bekuba nzima ngisho ukuvuka ngenxa yobuhlungu benhlizi-yo.
“Indodakazi yami yayiqanjwe igama layo ngubaba. Ngisebenzise ubuhlungu bokudlula kwayo emhla- beni ukuphindela esikoleni ngayokwenza iMasters kwiNuclear Physics. Maduze nje ngizobe sengiqala iPhD kwiNuclear Physics, okuyilapho ngilindele ukuba uma ngiqeda ngibuyele emphakathini wakithi ngiyokwenza umehluko omkhulu kuwona.
“Kuyimanje nginenhlangano engenzi nzuzo, iWomen In Science and Engeneering, ngoba ngifisa ukuba kugqugquzeleke abantu abasha, ikakhulukazi basezindaweni zasemakhaya ukubaluleka kwezifundo zeScience,” kusho yena.
Uthi ngaphansi kwale nhlangano uke ahambele izikole ezifundisa izingane ngemikhakha eyehlukile abangakwazi ukungena kuyona uma benze izifundo zeScience.
“Mina bengingeyena umfundi ophasa kahle kunabo bonke, ngisho othishela bami bangangifakazela futhi ngikhule ngiyingane ekhonze nokudlala.
“Uma sekukhulunywa ngomsebenzi wesikole-ke kangidlali, ngiyaphusha ngempela ngisebenze kanzima,” kusho uNkz Masango
Uhlonishwe nguMnu Jacob Zuma, ngesikhathi esengumengameli waseNingizimu Afrika, njengoba kube nguyena yedwa wesifazane ohambe nethimba lase-Afrika beyohola ucwaningo eConseil Européen pour la Recherche Nucléaire (CERN), eSwitzerland.
“Lokhu kungijabulise kakhulu nokuthi bekuyimi kuphela owesifazane kuleli thimba. Okwehlukile ngalo wukuthi bekuyithimba lakuleli lizwekazi liyosenzela ucwaningo ngaphandle kokusebenzisana nabanye. Abesifazane bakhona futhi bayanda nakuwona lo mkhakha. Yingakho ngifisa izingane zasezindaweni sazemakhaya ezifana nakhona KwaNongoma zingalinge zizibukele phansi,” kusho yena.
Kuyimanje uthi akalali, ubusuk ubuchitha ehleli e-laboratory laph enza khona ucwaningo ezilolonga ngokomsebenzi.
“Ngisebenza kanzima ukuba ngikhule kakhulu kulo mkhakha kanti ngibonga nangamathuba esengike ngawathola okuyoqeqeshwa emazweni aphesheya kwezilwandle anjenge-United States of America (USA) ne-United Kingdom (UK) ngoba angilungiselela ukuba uma kuphinde kuvela ithuba lokuphindela kwiCERN ngibe sengiqeqeshekile,” kusho yena.
Ifa asishiye nalo sisalidla namanje ngoba usifundisile.
nonhlakaniphos@ilanganews.co.z