UMA UMSAMO UHLANZEKILE, IZINTO ZIYENZEKA
KUBUKEKA kunzima kubantu ukuqonda ukuthi impumelelo yomuntu nomuntu inesikhathi esifanele efika ngaso.
Kuyiqiniso futhi ukuthi ukuze ufinyelele empumelelweni, kudingeka usebenze ngokuzikhandla nangokuzimisela. Abantu abaningi bacabanga ukuthi kufanele baphoqe ukuba bafike empumelelweni okanye basebenzise noma yiziphi izindlela ukufika lapho abahlale bephupha ukufika khona.
IsiZulu sithi: “Akuvelwa kanyekanye kungemadlebe embongolo.” Abantu abaningi kabavumelani nalokhu, kunalokho bakholwa wukuthi kumele badlubulundele, basebenzise konke okuphambi kwabo - okuhle nokungalungile - ukuze bafike empumelelweni.
Ngokwemvelo, sonke sidalelwe ukufinyelela lapho siphokophele khona kanti namathongo ethu asibekele izipho zethu okumele siphile ngazo, kodwa ngenxa yokutatazela nokuziqhathanisa nabanye - esikholelwa wukuthi sigcono kunabo - sigcina sesizifaka ogibeni lokuthatha noma yini ephambi kwethu ukuze sizibone sesibambe “igolide”.
Ngokwesintu, ukuhlanzeka kwekhaya nomsamo walo yikhona okuyinsika yokuletha impilo ejabulisayo kulowo nalowo mndeni. Ngeshwa abantu abaningi kabazilungisi izinto zabadala neziqondene namakhaya abo ngendlela efanele, kodwa bese belindela ukuthi kuzoba nenala empilweni yabo, ezongenisa umcebo nempumelelo kubona nezizukulwane zabo.
Uma kulungiswa kahle okwabadala, kuba yibona (abadala) abagada ikhaya futhi baqikelele nokuthi isibaya sabo - esiwukuphila, impumelelo nenqubekela phambili yekhaya - sivikelekile futhi siyama sibe yinsika.
Uma kunganakwa ukuthi izinto zenziwe ngendlela efanele, le nsika eyisibaya somuzi imane idliwe wumuhlwa, igcine isibuthakathaka bese igcina ngokuwuwisa bhu umuzi.
Abanye abantu abasezikhundleni eziphezulu, abafike kuzo- na ngezikhwepha, bengazange badedele abadala nemvelo ukuba babambe iqhaza elifanele nangesikhathi esifanele, bagcina bezithola bengahleli kahle kulezo zikhundla.
Zigcina zibasokolisa, kungabikhona ukuthula nenhlalakahle. Okumele sikuqonde wukuthi izinto ezinhle zitholwa ngabakwazi ukulinda. Imvelo vele kayitatazeli, inesikhathi okwenzeka ngaso izinto okufanele zenzeke, kayixovi kodwa inika okuyikho ngesikhathi esifanele. Sengathi kungcono ukulinda impumelelo enokuthula - ezokwenza ulale ebusuku - kunokuba uthi ubheke- ne nezinselelo ezisemthethweni zesikhundla okusona ube futhi usempini yokungahlaliseki kuleso sihlalo esishisayo. Sishisiswa wukuthi akusona esakho okanye ngesakho kodwa isikhathi sokuba uhlale kusona kasikakafiki.
Kungezwakala kuyimbudane lokhu engiphawula ngakho kodwa ubude bendlela yempilo buyakuveza futhi buyasifundisa ukuthi ukuhlonipha nokugcina izidingo zomsamo oyinsika yekhaya, kuyawumisa umuzi bese izinto ezinhle zenzeka. Kakudingeki ukuyothwala nokusebenzisa izimpande okuthiwa ezokukhuphula umsebenzi, kodwa kudingeka ubudlelwano obuqotho nobuhlanzekile nethongo ukuze lona lenze izinto zikhanye zidlondlobale, lizikhulumele futhi libonise ukuphila kwalo.
Abantu bazithola sebengene ezintweni ezinkulu nezisabekayo, ababengacabangi ukuthi bayoke bangene kuzona ngoba nje bexakwe yindlala.
Kuyiqiniso ukuthi kwesinye isikhathi abanye abantu badukiswa ngabanye ababathembayo, abaya kubona beyofuna usizo futhi benethemba lokuthola usizo olumsulwa, kodwa bazithole sebenziswa okungekhona, badukiswe bengaqondile.
Baye bazithole sebephakathi ogibeni lokwenza izinto ezilukhuni ngethemba lokuthi impilo izoba ngcono nempumelelo bazoyibona. Okubuhlungu ngalolu hlobo lwempumelelo wukuthi luyagqilaza futhi lukuxabanisa nabadala ngoba luyabangcolisa bese kudingeka ukuba wehle wenyuka ekuhambeni kwesikhathi, usuzama ukulungisa insika yekhaya eyoniwa wukuphuthuma impumelelo yezindlela ezisheshayo.
Impumelelo ebhizinisini, emsebenzini noma empilweni nje jikelele, iba nokuthula inike nenjabulo uma ifike ngendlela elungile nangesikhathi esifanele. mthiyanesgs@yahoo.com