Imvunge ngoMvikeli woMphakathi
IYAKHULA usuku nosuku eyokungenami kwabathile emphakathini ngoMvikeli Womphakathi, u-Adv Busisiwe Mkhwebane, ongene esikhundleni ebesiphethwe yisikhondlakhondla esingu-Adv Thuli Madonsela kusukela ekupheleni kukaMfumfu (October) 2016.
Ziya ngokwanda izigigaba ezinomthelela kule mvunge ekhona ngoAdv Mkhwebane, phakathi kwazo kubalwa nalezo ezibukeka ziwukuhudula izinyawo kwehhovisi lakhe ekuphenyeni ngemibiko yenkohlakalo, ikakhulukazi lapho kuphatheka khona amagama abantu abasezikhundleni eziphezulu.
Umsindo okhona njengamanje ngo-Adv Mkhwebane, ungesinqumo asenzile ngodaba lombhalo kaNkk Helen Zille ongundunankulu waseWestern Cape, awubhale kwi-twitter nyakenye, othi, “kulabo abathi ubukoloni babunobubi kuphela, mabacabange ngohlelo lwezomthetho oluzimele, ezokuthutha, ingqalasizinda, amanzi athunyelwa ngamapayipi, njll”.
Phakathi kokunye akushoyo u-Adv Mkhwebane ngesinqumo asenzile ngombhalo kaNkk Zille, wukuthi;
“Lo mbhalo ubuyise ubuhlungu obukhulu nokuhlukumezeka kulabo abayizisulu zobandlululo nobukoloni eNingizimu Afrika. Yena (uZille) uyahalalisa ngengcindezelo, ukuxhaphaza, ukucwasa ngokobuhlanga nobumpofu konke okuwumphumela oqondene ngqo walokho ubukoloni obuyokhunjulwa ngakho”.
Ngaleyo ndlela u-Adv Mkhwebane ube esenquma ukuthi uNkk Zille - njengondunankulu waseWestern Cape - wephule izigaba 2.1(c) no-(d) nesigaba 2.3(c) semiyalo yokuziphatha ( Code) kwamalungu esishayamthetho.
Ngaphandle kwalesi sinqumo, kukhona okunye vele obekukhalwa ngakho maqondana nendlela asebenza ngayo u-Adv Mkhwebane selokhu ethathe lesi sikhundla.
Okokuqala okwenze umphakathi washaya amakhala kungakafudu- mali ngisho nesigqiki eqhwakele kusona u-Adv Mkhwebane, wudaba lombiko oyisibambiso ka-Adv Madonsela ngodaba lwezokuqinisa ezokuphepha emzini kaMnu Jacob Zuma obengumengameli waseNingizimu Afrika.
Kwaphinda kwaba wumbiko wakhe ngodaba lwenkohlakalo yasepulazini i-Estina eliseFree State obungasho lutho ngoMnu Mosebenzi Zwane noMnu Ace Magashule, abebenukeka kuyona.
Ubuye wazinameka ngodaka futhi ngesikhathi ethi ibhange i-Absa kumele likhokhe imali elahlomula ngayo litakulwa ngesikhathi sikahulumeni wobandlululo. Manje sekuqubuka udaba lombhalo kaNkk Helen Zille.
ILANGA lixhumane nomhlaziyi wezepolitiki, uSolwazi Steven Friedman, oqale ngokubalula ukuthi umsebenzi ka-Adv Mkhwebane wukuvikela umphakathi ekunyathelweni ngezinyawo kwamalungelo awo yizikhulu zombuso.
Uqhubeke wathi lokho kukodwa kusho ukuthi umvikeli womphakathi ihhovisi lakhe kalijutshiwe ukuphenya izikhalo zalolu hlobo (njengombhalo kaNkk Zille), ngakho uphange ukwenza umsebenzi ongaqondene naye (okungoweSouth African Human Rights Commission).
Ucacise nokuthi uhlobo lombhalo kaNkk Zille luveza isimo osopolitiki abasebenza phansi kwaso nsukuzonke, vele esigcwele indlela yokukhuluma elumelayo nenohlalwane.
“Ngakho nxa engase alandele konke okukhulunywa ngosopolitiki, angagcina esechitha isikhathi sakhe sonke ephenya ngabakushoyo," kusho uSolwazi Friedman.
Maqondana nokulungela kukaAdv Mkhwebane ukuqhoqhobala lesi sikhundla, uthe okumqoka wukwethembana phakathi kwakhe nomphakathi ngokuba umbone engumuntu ongachemile.
Uthe kepha izigigaba ezibikwayo ngaye sezivele sezikubulele ukwethenjwa kwakhe wumphakathi. Okunye okwenziwa ngu-Adv Mkhwebane okukhombisa ukungakwazi akujutshelwe ngokwesikhundla sakhe ukuba akwenze, wukutshela iphalamende ukuthi kumele lichibiyele umthethosisekelo wezwe ukuze kuguqulwe indlela okulawulwa ngayo ibhange lombuso - okuyinto engaqondene nehhovisi lakhe.
USolwazi Friedman uphethe ngokweluleka ukuba u-Adv Mkhwebane agxile emsebenzini wakhe wokuvikela umphakathi.