BADINWE UKUDLALELA UBALA KWEKAMEYIWA
ZIDINWE wukudlalela amahhala izinkakha ebezinandisa emdlalweni wokukhumbula uSenzo Meyiwa obungoMgqibelo odlule eKing Zwelithini Stadium, eMlazi.
Enye yezinkakha ekhulume naleli phephandaba kodwa yenqaba ukudalulwa igama, izeseka ngokuthi kayifuni kube sengathi yayizele indlala, ithe kubaphathe kabi ukusuka eGoli bezodlalela amahhala. Ithe ngesikhathi abahleli balo mdlalo bexhumana nabo, babathembisa ukuthi bazobanika u-R10 000 umdlali ngamunye. Le nkakha ithe uR10 000 yimali abavamise ukuyinikwa uma bedlala imidlalo ehlelwe yimikhandlu yomasipala.
“Siqale ukusola umgqakazo ukuthi kukhona okungalungile ngesikhathi sicela umhlangano noNtokozo Sikhakhane (ongumgqugquzeli wale midlalo) ukubuza ngemali. Usitshele ukuthi umasipala weTheku athi ubuthembise ukumuxhasa, umujikele esiswini njengotshwala.
“Sikubeke kwacaca ukuthi ngeke sidlale, kungcono siphindele emuva ngoba phela sihambele amahhala. Kusize ubaba kaSenzo, olandwe isigubhukane wafika wasincenga ukuba sihloniphe umndeni naye ngokudlalela indodana yakhe. Uyise kaSenzo ubekhulu- ma ewusizi, savele sadabukela umuntu omdala, saqoma ukungena enkundleni sanandisela abalandeli,” kusho le nkakha.
USikhakhane uvumile ukuthi izinkakha kazitholanga ngisho indibilishi ngenxa yokwentula abaxhasi.
“Sibachazelile ukuthi njengoba sisayiqala into kaSenzo, sihlangene nezingqinamba eziningi. Akukho nathi ebesingakwenza ngoba sazama kwabheda ekugcineni. Sethemba ukuthi ngokuzayo isimo sizokuba ngcono. Okungithokozisayo wukuthi ekugcineni kudlaliwe, abantu bajabula nomndeni kaSenzo,” kusho uSikhakhane.
Izinkakha ebezikhona kubalwa uLucky “Phinda Mzala” Lekgwati, uMlungisi “Professor” Ngubane, uFabian McCarthy, uNhlanhla “Popo” Mshibe, uJaphet Zwane, uTsepo Ntsoane, uThapelo Liau, uSteve “Chippa” Lekoelea, uThabo “Tsiki-tsiki” Mooki, uDerrick Spencer, uJoseph “Dukukudu” Makhanya, uManqoba Mkhize, uSiyabonga “Nsimbi” Sangweni, uSandile “AK 47” Ndlovu, uPapi “Ginger” Zothwane, uMolefi “Ace” Ntsoelengoe, uJabulani “S-Curl” Mendu, u-Abel “Chacklas” Shongwe, uMbulelo “OJ” Mabizela, uSiphesihle “Scara” Ngobese ukukha nje phezulu.