KUCHITHWE IMIDLALO EMANDENI
ISIYEHLISIWE iminyaka yabadlali abazobamba iqhaza emidlalweni kanobhutshuzwayo ezokuba seMacambini Sports Ground ngoMgqibelo kusukela ngo-10 ekuseni.
Le midlalo ehlelwa yiMacambini Tribal Council nabakwaTongaat Hulett, izogijinywa ngabadlali abaneminyaka engaphansi kwengu-17 ubudala. Phambilini ibivulelekile.
Lapha kuzokube kuqhudelana amakilabhu amane angaphansi kwamakhosi okubalwa kuwona eyaseMacambini, eyakwaKhoza, eyakwaMhlongo neyakwaNzuza.
Imidlalo ichithiwe eMandeni njengoba uMasipala uhlele imidlalo yezikole ezokuba ngosuku olufanayo KwaNcedomhlophe Sports Ground.
Kule midlalo kuzokube kuqhudelana izikole ezine ebezibambe iqhaza kwiMshazi Tournament nezine eziqede phezulu kwi- log yeSAB League yeMandeni Local Football Association.
Ngeledlule bekuhlelwe imidlalo yeBuild It. USiphesihle Zulu oyiMeya yaseMandeni, uthe sebethathe isinqumo sokuhoxa emidlalweni yamaSalga ngoba kayisatheli zithelo. Uthi bathathe isinqumo sokuthi imali yokulungiselela amaSalga itshalwe ezinhlelweni zokuthuthukiswa kwezemidlalo endaweni.
Kuthiwa omasipala abangaphansi koMkhandlu weLembe, bazohoxa bonke kumaSalga Game.