I-Russia ithembisa imfudumalo kwabebhola
Igcizelela ukuthi akekho ozocwaswa kweyeNdebe yoMhlaba
ATHENJISWE imfudumalo nokuphepha amazwe azobamba iqhaza kwiNdebe yoMhlaba eqala namuhla ngoLwesine isongwe ngeSonto mhla ka-15 enyangeni ezayo eRussia.
IRussia yiyona ezovula le midlalo ngokubhekana neSaudi Arabia namuhla ngo-17h00.
UVladimir Putin onguMengameli waseRussia, utheleke kungazelele muntu kwingqungquthela ka-68 yeFederation of International Football Association (Fifa) izolo ngoLwesithathu, eMoscow, eRussia.
UPutin unikwe ithuba lokukhuluma kulo mhlangano. Kungaleso sikhathi-ke lapho ethembise khona izivakashi impatho entofontofo.
“Ngithanda ukugcizelela ukuthi zizophepha zonke izivakashi zethu ngesikhathi seNdebe yoMhlaba. Abantu baseRussia kudala beyilangazelele imidlalo yeNdebe yoMhlaba, manje isifikile. Ngithanda ukusho ukuthi akukho bantu abazocwaswa ngokwebala kuleli lizwe. Senze konke ukuqinisekisa ukuthi izivakashi zethu zizizwa zisekhaya,” kusho uPutin.
Abalandeli bebhola baseRussia badume ngokucwasa abantu abansundu. USiyanda “Magazi” Xulu weMaritzburg United, ungomunye wezisulu zokucwaswa ngokwebala eRussia, njengoba ebuye khona kungasekuhle ngemuva kokuxabana nomqeqeshi wekilabhu abeyidlalela. Ubemsola ngokumcwasa ngokwebala.
Kulo mhlangano weFifa, kuvotelwe amazwe aholwa yi-United States of America (USA) ukusinga- tha iNdebe yoMhlaba yango-2026. I-USA ihambisana neMexico neCanada.
Umcimbi wokuvula iNdebe yoMhlaba uzoqala ngo-15h30 namuhla ngaphambi komdlalo weRussia neSaudi Arabia. Lo mcimbi uzokuba seLuzhniki Stadium, eMoscow. Le nkundla yiyona futhi ezosingatha umdlalo wamanqamu. Emcimbini wokuvula kulindeleke abadansi abangaphezulu kuka-500, kanti umculi obhekwe ngabomvu nguRobbie Williams wase-England.
Kuzophinde kube nomunye umcimbi ozoqhubeka eRed Square ngesikhathi esifanayo nowokuvula lo mqhudelwano. UJennifer Lopez noPitbull yibona abebehamba phambili emcimbini wokuvula imidlalo yango-2014, eBrazil.