UMQEQESHI UHLIPHIZE IZINHLELO ZE-SPAIN
KUHLIPHIZEKE izinhlelo zeSpain ihlukana noJulen Lopetegui ongumqeqeshi sekubalwa amahora kugijinywe imidlalo yeNdebe yoMhlaba ezoqala namuhla ngoLwesine isongwe ngeSonto mhla ka-15 kuNtulikazi (July) kophezulu eRussia.
Lo mqeqeshi ukhululwe ngemuva kokumenyezelwa njengomqeqeshi omusha weReal Madrid esanda kulaxazwa nguZinedine Zidane waseFrance obeyilolonga.
ISpain izovula imidlalo yamaqoqo ngokududulana nePortugal ngoMgqibelo ngo-20h00. IRussia yiyona ezovula lo mqhudelwano ngokubhekana neSaudi Arabia namuhla ngoLwesine ngo-17h00. ULuis Rubiales onguMengameli weRoyal Spanish Football Federation, uthe bathathe isinqumo sokumkhulula ngokushesha lo mqeqeshi ngoba ubahambe ngemuva.
“Sibone kungcono ukuba simkhulule umqeqeshi. Simbonga kakhulu ngakho konke asenzele khona. Silapha kwiNdebe yoMhlaba ngenxa yamagalelo akhe. Nokho-ke asiyithandanga indlela aziphathe ngayo. Iqembu lesizwe ngelabo bonke abantu baseSpain, ngakho-ke kumqoka ukuba lihlonishwe.
“Kaseneme ngendlela alusingathe ngayo lolu daba. Sikholwa wukuthi ikhona enye indlela abengenza ngayo.
"Kubi kakhulu ukuvela kwalezi zindaba sekubalwa izinsuku sidlale umdlalo wokuqala weNdebe yoMhlaba.
"Umdlalo wokuqala umqoka kakhulu ngoba ucacisa okuningi ngekusasa lenu emqhudelwaneni,” kusho lesi sikhulu.