I-CHIEFS ICUTHELE OSIKAZWA NGEJOZI KWI-PIRATES
ZIYA ngokuqina izinsolo zokuthi iKaizer Chiefs esematasa ithungatha umqeqeshi, icuthele izinsalela ezizovuthuzwa yi-Orlando Pirates.
IBucs kayizibekile phansi emakethe njengoba ingena ingenile. NgoMsombuluko imemezele abadlali abangu-9 ebasayinisile. Kubhekwe ukuba ichithe abadlali bayo abebewumgogodla kula masizini edlule. Phakathi kwabadlali okuvela ukuthi bangase bakhalelwe yizembe kungabalwa uThamsanqa Gabuza, u-Ayanda Gcaba, uMark van Heerden, uNkosinathi Mthiyane, uThamsanqa Sangweni, uMpho Makola, uThabo Matlaba noBernard Morrison ukukha nje phezulu.
Leli phephandaba lithole ukuthi iChiefs ikubheke ngabomvu ukuthi iBucs izomisa kanjani ngoMakola. Kuthiwa uma nje iPirates ike yamchitha izomthatha.
Umthombo weLANGA ongaphakathi kwiChiefs uthe: “Abantu bacabanga ukuthi sithule nje silele kanti kakunjalo, siyasebenza esithe njengoba nabo bebenza, kuzothi kungahlangana yonke into bese siyamemezela. Umuntu esibheke ukuthi iPirates izomdedela yini nguMakola, uma imchitha sizomthatha, angasisiza lo mfana.
“Futhi akamudala kakhulu njengoba eseneminyaka yobudala engu-30. Bakhona abanye abadlali esixoxa nabo kodwa ngeke ngikwazi ukubadalula okwamanje ngoba sesixhoshwe abadlali abaningi selokhu nje kuvuleke iwindi lokudayiselana ngabadlali sibala naye u-Andile Jali esimemezele ukuthi siyamfuna iSundowns yagijima yamthatha.
“Lusenzima olomqeqeshi kodwa kukhona okuhlanganayo. Abantu abalinde nje iChiefs nayo izolumemezela uhlu lwabadlali ebachithayo nezobasayinisa futhi abalandeli bazoluthokozela.”
Umdlali okuvela ukuthi iChiefs ixoxa naye ngu-Andriamirado “Dax” Hasina Andrianarimanana waseMadagascar okuthiwa imubanga namanye amakilabhu akuleli.
Imizamo yokuthola uBobby Motaung oyiMenenja jikelele yeChiefs ukuba aphawule ngalolu daba, iphunzile njengoba ucingo lwakhe belukhala kodwa engalubambi.
UVina Maphosa wezokuxhumana kwiChiefs, uthe baphezu kwezinhlelo angangabazi ukuthi zizobajabulisa abalandeli babo.
“Engifuna ukukubeka kucace nje wukuthi ngeke nangengozi ukuthi ikilabhu enkulu njengeChiefs ingene ensimini ingenaye umqeqeshi.
"Kunezimfanelo ezisalungiswa okuzokuthi uma seziphothuliwe bese sizimemezela. Kukhona esiphezu kwakho, lokho angikungabazi kodwa yikhona nje ukuthi ngeke sikumemezele zingakapheleli zonke izinhlelo,” kusho uMaphosa.
Limubuza leli phephandaba ukuthi angase amenyezelwe ninike umqeqeshi omusha, abadlali abasha nalabo abazodedelwa uMaphosa, uthe: “Ngeke siwaqale amalungiselelo esizini entsha umqeqeshi engekho, lokho ngingakuqinisekisa. Futhi-ke umqeqeshi singamumemezela noma yinini uma nje sesiqede konke naye. Uma singaqeda naye namhlanje (izolo ngoLwesithathu) singamumemezela kusasa (namuhla ngoLwesine).
“Abadlali abasha nesizobadedela nakhona yisimo esifanayo kodwa ngeke aqale amalungiselelo esizini entsha singazange simemezele izinguquko.”
Kunezimfanelo ezisalungiswa okuzothi uma seziphothuliwe bese simemezela...