UKUKHIQIZWA KWAMAKHONDOMU KUZOSABALALISA UMNOTHO KULELI
KUZOKWENZA umehluko omkhulu eNingizimu Afrika ukukhiqizwa kwamakhondomu KwaZulu-Natal, emuva kwesikhathi eside elandwa eChina.
UNgqongqoshe wezeMpilo KwaZulu-Natal, uDkt Sibongiseni Dhlomo, uthi ukusebenza kwendawo ekhiqiza amakhondomu, iHBM SA Condom Factory, eyakhiwe eDube TradePort, eThekwini, kuzokwenza ukuba umnotho wakuleli wenyuke ngoba ubumkhulu umsebenzi obuwenziwa elandwa kwamanye amazwe ukuze asatshalaliswe emiphakathini yaseNingizimu Afrika.
Uthi le ndawo isezingeni eliphezulu futhi izosebenza ubusuku nemini. Amakhondomu akhiqizwayo ngosuku, angaphezulu kuka700 000. Utshele abezindaba ukuthi ngokuhamba kwesikhathi, lesi sibalo sizonyukela ku-1,4 million ngosuku.
“Sijabule ukuthi uNgqongqoshe wezeMpilo kuzwelonke, uDkt Aaron Motsoaledi ukwazile ukuzobona le ndawo ngoLwesihlanu, okuyinto enika ithemba kakhulu ngokuthi umkhiqizo wethu owenziwa lapha eDube TradePort usezingeni eliphezulu.
"Le ndawo inezisebenzi eziwu30 okwamanje, okuyinto esiyibonga kakhulu kwazise izokhuphula umnotho wethu nezimpilo zabantu zizoshintsha,” kusho uDkt Dhlomo. Uthi lesi sakhiwo silekelela kakhulu iKwaZulu-Natal, ngoba akekho umuntu ozothi ushoda ngamakhondomu futhi umphakathi usungakwazi ukuzilandela wona mathupha kuyona le ndawo, uzisabalalisele uma uthanda.
Uveze ukuthi ngisho abasemazweni aphesheya, sebengakwazi ukusebenzisana neNingizimu Afrika ukuze bathole lo mkhiqizo. Le ndawo uthi idle imali elinganiselwa ku-R150 million yakhiwa, kanti izokwazi nokuvulela intsha engaphezulu kuka-156 amathuba emisebenzi uma sekunesikhashana iqalile ukusebenza.
“Okujabulisa kakhulu wukuthi le nkampani isiqalile ukusebenza futhi-ke inikeze abantu bendawo amathuba. Kuyiqiniso elingeke liphikwe ukuthi amakhondomu siyawadinga kakhulu,” kusho uDkt Dhlomo.
Isikhulu esiphezulu sakwaHBM SA, uMnu Sbusiso Lushaba, sithi sekuqaliwe ukuqeqeshwa kwabantu abazokwenza umsebenzi wokukhiqiza amakhondomu.
Sitshele ILANGA ukuthi iNingizimu Afrika yonkana izobe isatshalaliselwa yibona la majazi omkhwenyana.
“Sesibaqeqeshile abawu-30, sebeyawazi umsebenzi kanti ngesonto elizayo kuzobe kuqalwa kusetshenzwa.
"Lokhu sikwenze ngoba sibona kubalulekile ukuba sisebenzise ulwazi esiluthole kwamanye amazwe ngenhloso yokulekelela iNingizimu Afrika,” kusho uMnu Lushaba.
Uthi uhlobo lwamakhondomu abazolwenza lubizwa ngeMax futhi luyizinhlobonhlobo ezehlukene ezinuka kahle.
Sebeqeqeshiwe abanye, sebeyawazi umsebenzi, kuzoqala kusetshenzwe.