Uthi ushayelwa iGcokama oweChalaha
Udadewabo uthe usuthi amankwebevu
UKHALA ngokushayelwa ukuvulela ithuba uMthandeni “iGcokama Elisha” Manqele ukuba akhulume emngcwabeni kaMjikijelwa “iChalaha likaShafuza” Ngubane obuKwaJikijiki, KwaMaphumulo mhla zimbili kuNhlangulana (June) umfowabo waleli ciko elishone ngenyanga edlule.
UMnikezwa Ngubane, utshele ILANGA ukuthi isono sakhe wukuthi unikeze iGcokama ithuba, yingakho eqheliswa ezintweni ezithinta uMjikijelwa njengoba umndeni wakubo kuthiwa usuqoke iwele lakhe, uBheki, ukuba lihole aMangcukumane, okuyiqembu leChalaha, nazo zonke izinto zalo mculi azishiye emhlabeni - okubalwa nezimoto.
Ngokuthola kweLANGA, bekuzoba nguyena uMnikezwa obezoqhubeka nomculo kaMjikijelwa, kodwa lokho kwashintshwa ngenxa yokuthi nabalandeli beChalaha bathi akakhombisanga ukuhambisana nabo.
“Ebesivumelene ngakho ekhaya wukuthi amaqembu ngizowabheka naye uBheki, kungabi ngumuntu wangaphandle ngoba lokho kuyokwenza ukuthi izingane zikaMjikijelwa zingahlomuli lutho.
“Konke ebengizokwenza bengizobe ngilwela ukuthi kungafadalali izinto zakhe ekubeni ngikhona emculweni. Yimina okumele ngiqhubeke nezinto zikaMjikijelwa kodwa ngiyakhishwa ngoba kuthiwa ngahlangana nesitha sakhe, uMthandeni, ngasivumela ekhaya ngelanga lomthuno.
“UMjikijelwa bengimsiza emculweni, ngamfundisa nesigingci, ngisho estudiyo ubengayi ngingekho, ngisho kuyoculwa bukhoma ubethatha mina ngoba ubengithemba.
“Kangisoze ngivume uThembi Ngubane (okhulumela inkampani kaMjikijelwa, iMjikijelwa Music Production) asimoshele izinto zasekhaya ekubeni sisekhona,” kusho uMnikezwa.
Uhlabe wahlikiza eyokuthi uThembi athi i-albhamu kaMjikijelwa ashone isizophuma, isizobizwa ngokuthi ezeChalaha, wathi ngeke kwenzeke lokho. Uthi nguyena owazi konke ngomsebenzi we-albhamu eshiywe nguMjikijelwa estudiyo.
“UMjikijelwa akaze athi uma eseshonile makushintshwe i-albhamu yakhe ibizwe ngelinye igama. Kangiphikisani nokuthi kwenziwe elinye iqembu lezeChalaha, kodwa i-albhamu eyashiywa ngumfowethu emshinini, izophuma ibiza igama lakhe.
“UThembi umsebenzi wakhe ngowokuba yimenenja kaMjikijelwa, abheke umsebenzi osuphumile, akahlangani nokuqoshwa komculo wakhe,” kusho uMnikezwa.
Utshele leli phephandaba ukuthi uBheki akakaze acule nhlobo empilweni yakhe, ubeshuthiswa ezithombeni zama-CD kuphela eqenjini aMangcukumane.
Uthi ngeke ehluleke wukucula kowakhe umsebenzi awubhanqe nokaMjikijelwa, kodwa uma eqheliswa kayikho inkinga ngoba akahlo- sile ukuduma ngezinto zeChalaha.
“Le nto ingihlukumeza kakhulu ngoba yimina okumele aqhubeke nomculo kamfowethu bese uBheki aqhubeke ashuthe njengoba ebenza kusekhona uMjikijelwa,” kusho uMnikezwa.
UBheki uthe sesithathiwe isinqumo sokuthi konke okweChalaha kubhekwe nguyena. Uthi lokhu kufinyelelwe kukhona emuva kokuba neqembu lonke likaMjikijelwa liphakamise igama lakhe.
“Kunezinto ezinzima zasekhaya engingeke ngikwazi ukuzidalula ezintathelini, okuyizona ezenze ukuba kufikwe nakulesi sinqumo,” kusho uBheki.
UNkz Thembi Ngubane, uthe sebeqoke uBheki ukuba ahole amaqembu kaMjikijelwa. “Ukumshintsha kube yisinqumo sabalandeli abakhale ngokuthi ngeke kube nguMnikezwa ngenxa yokuthi naye ubevele aziwa njengomculi ozimele futhi onenkampani yakhe yokuqopha nakuba ekuqaleni babethi kuzoba nguyena.
“Kubonakale nokuthi uzoba nomsebenzi omningi uma ebhanqa owakhe nokaMjikijelwa. Konke nje akushoyo uMnikezwa udak...” kusho uNkz Ngubane.
UMjikijelwa ubengowesibili ezinganeni zakwabo eziyisi-9. Omdala kwabo uMnu Hlulokwakhe, alanywe uMjikijelwa kube uMnikezwa newele lakhe uBheki, kulandele amantombazane noMnu Solangaliphi wokugcina othweswe iziqu zemfundo ephakeme e-University of KwaZulu-Natal (UKZN) kuwona lo nyaka.
ILANGA like labika phambilini ngokuxoshwa kweGcokama kwaNgubane, lithi liyobakhalisa ngokushona kukaMjikijelwa, obekusolwa ukuthi belihlekisa ngokugula kwakhe.