AKUVUMI NOKUBA AKHULUME OWEBELWE IZINKOMO EZINE ZAHLINZELWA EDIPHINI
UKHALA ezimathonsi owesilisa waKwaSthebe, eMandeni okuntshontshwe izinkomo zakhe ezine ngoLwesihlanu ebusuku zisesibayeni zabulawa, zahlinzwa kwakhishwa izisu namanqina kwalahlwa eduze kwasediphini.
Lezi zinkomo ezebiwe kuthiwa zishiye amathole esibayeni, okumanje akhala ubumayemaye. Kunzima ngisho ukukhuluma kuMnu Njabulo Makhoba (30), othi izinkomo zakhe zebiwa nje, ubengekho esemsebenzini, kwazise ubengena ebusuku.
Ukhala ngokuthi akazi uzowenzenjani la mathole kwazise adinga ukunceliswa.
“Ngiqaphele ekuseni ngifika ukuthi izinkomo zami kaziphelele. Kuthe uma ngisondela esibayeni ngabhekisisa kahle ngoba ngizazi zonke.
"Ngibone ukuthi zine ezingekho, ngangena endlini ngabuza abashana ukuthi zikuphi ezinye izinkomo ngoba kazijwayele ukulala emadlelweni. Bethuke kanye nami ngoba bebazi ukuthi zikhona esibayeni,” kusho uMnu Makhoba.
Uthi uthathe abafana baphuma bayozibheka ngoba ubesenakho ukusola ukuthi kukhona okushaya amanzi ngokunyamalala kwazo. Uphelelwe ngamandla, weswela ngisho amazwi okukhuluma ngesikhathi ezithela phezu kwezisu zazo ngasediphini, kugcwele igazi phansi, kubonakala ukuthi kade zihlinzelwa khona lapho.
“Lesi senzo sethuse ngisho amalungu omphakathi, kwazise uyaqala ukubona into efana nale. Ngisola umona kuyo yonke le nto. Abantu abayenzile babona ukuthi ngingumfana omncane kodwa ophumelele, nginenqwaba yemfuyo kodwa ngiphila ngokubamba amatoho.
"Umuntu owenze le nto ubazi kahle ukuthi kangikho ekhaya ngizobuya ekuseni. Ubenesikhathi sonke,” kusho uMnu Makhoba.
Uthi uzowulandela aze awuthole umkhondo ngoba bayaziwa abantu abantshontsha izinkomo endaweni yabo, kodwa kuyaqala ukuba kwenzeke into efana nalena eyenzeke kwezakhe - ukuba zebiwe, zihli- nzelwe endaweni kukhiswe izisu.
Okhulumela amaphoyisa KwaZulu-Natal, uCol Thembeka Mbhele, uthi kuvulwe icala lokwebiwa kwemfuyo. Uthi bekungakaboshwa muntu, amaphoyisa asenza uphenyo.