Kubanjwe abafana ngabangani ababulewe
Kusize abazali ukuze bazinikele
KUSIZE abazali ukuze bazinikele emaphoyiseni abasolwa ababili abasolwa ngamacala okubulala abangani ababili abebedayisa eKranskop, izidumbu zabo ezitholwe zigqitshiwe emgodini ongashoni ngeledlule ngoLwesibili.
ILANGA lithole ngokhulumela amaphoyisa KwaZulu-Natal, uCol Thembeka Mbhele, ukuthi kuboshwe abasolwa ababili amagama abo esiwagodlile baze bavele enkantolo.
UCol Mbhele uthi laba basolwa baneminyaka ewu-17 no-18. Uthi omunye wabo utholakale nesibhamu esingekho emthethweni kanti bazovela bobabili ngoLwesibili eNkantolo yeMantshi yaseKranskop.
ILANGA libike kabanzi ngoLwesine ngodaba lokubulawa ngesihluku kukaMnu Jabulani Maphumulo (40) wasePretoria noMnu Tatenda Gazvivnga waseZimbabwe, abebengabangani, bedayisa izingubo zokulala nobhavu edolobheni laseKranskop.
Izidumbu zabo zitholwe ngoLwesibili ntambama zigqitshwe ehlathini.
Imoto abebehamba ngayo itholwe ehlathini, izimpahla abebezidayisa zithokale eceleni kwalapho bebegqitshwe khona.
Abafi kuthiwa bebedayisela eKranskop kodwa behlala eGingindlovu.
Kuthiwa abasolwa ngesikhathi bebahlasela bathathe imali nomakhalekhukwini babo base beyababulala qede babagqiba. Nakuba bagcine betholakele abafi, kusize intombi kaMnu Gazvivnga efonele umndeni iwazisa ukuthi akatholakali ocingweni lwakhe, sesishaye saze sadlula isikhathi avamise ukubuya ngaso uma kade eyodayisa.
Kuthiwa abafowabo baphume inqina beyobheka ngalapho edayisela ngakhona nomngani wakhe. Balandele umkhondo okuthe besesendleleni, bazithela phezu kwesicathulo sikaMnu Gazvivnga emgwaqweni oseduze nehlathi.
Bafonele amaphoyisa ngokushesha okuthe uma kumbiwa, kwatholakala izidumbu zabo zinqunu, kunezitho zomzimba esezicwiyiwe.
ILANGA lithole ukuthi amalungu omphakathi abambe iqhaza elimqoka esebenza ngokubambisana namaphoyisa, kulandelwa umkhondo wabasolwa okugcine kuholele ekutheni abazali babo babaqhube babayise emaphoyiseni.
Amalungu omphakathi wakule ndawo azwakalise ukuthi athukuthele ngale nto eyenziwe yilaba bafana. Akhale ngokuthi le nto eyenziwe yilaba bafana ingcolisa indawo yabo.