UMNYANGO UKHUZA UDLAME EZIKOLENI
UMNYANGO wezeMfundo KwaZuluNatal usunxuse umphakathi ukuba ubambe iqhaza ukulwa nodlame lwabafundi ezikoleni olubeka engcupheni othisha.
UMnu Muzi Mahlambi, okhulumela lo mnyango, uthi abazali mabangayekeleli konke kothisha kwazise izingane ziphuma emakhaya nezikhali, okwenza izikole zingabi yindawo ephephile.
Uphawula kanjena nje, kuputshuke i- video yomfundi wesifazane wakwesinye isikole ogwaze uzakwabo ekilasini kubuka bonke abafundi kade belwa, kanti kwesinye kubonakale i- video abafundi belwa endaweni yokufundela.
Kulezi zikole ezisematheni kulezi zinsuku, kubalwa iJohn Dube High naseKhandleleni High.
UMnu Mahlambi uthi umnyango uyakholwa wukuthi abaholi bomdabu bangenza umehluko ukuze kulungiseke isimo esingesihle ezikoleni.
“Siyayikhuza le nto ngoba nezimpi zezigodi ziqala ngakho ukusuka komfundi alimaze omunye, bese abangakubo beyovimba abanye abantwana. Kuwumsebenzi wabazali ukuxoxa nezingane inqandeke le nto esiyibona ilokhu yanda ezikoleni,” kusho uMnu Mahlambi.
Uthi zikhona izinyathelo umnyango ozithathela bonke abatholakala odlameni olwenzeka emagcekeni esikole nakuba engeke akhulume ngazo okwamanje.
Uveze nokuthi isikole kumele kube yindawo ephephile, eqeqesha abantwana ukuba baphumele emphakathini beyisibonelo.
“Siyazi ukuthi bakhona othisha abayaye bathinteke ezigamekweni ezingezinhle, kodwa okwenziwa ngabantwana sengathi sekwedlulele. Amakhansela nawo angawenza umehluko, empeleni sinxusa bonke abantu abangabaholi emphakathini ukuba babambisane nathi emnyangweni ukuze kwakhiwe isizwe,” kusho uMnu Mahlambi.