UMCULI WE-JAZZ UTHI UMA IMVELO IBABIZA, BAYAYILANDELA
UKUBULAWA yisizungu - emuva kokuba seGoli - kwenze umculi wesifazane oseqala ukuzakhela igama kubalandeli be-jazz, umbhaqanga nomasikandi, wasungula iqembu labaqwali bezintaba eThekwini.
UNonhlanhla “NoniMuso” Luthuli (38), waseNtshongweni, usungule i-Ubuhle Bemvelo Hikers (UBH), ngo-2016 emuva kokubuya eGoli lapho abeqwala khona izintaba nelinye iqembu.
“Ngifike lapha ngabona ukuthi nginesizungu, kwazise ukuqombola nokuqwala izintaba bese kusegazini. Nginxenxe umngani wani uBongi, ukuba siqale naye, saqala kanjalo. Ngokuhamba kwesikhathi sikhulile sagcina sesiyiqembu njengoba manje sesiwu-15,” kusho yena.
Uthi inhloso ye-UBH wukuqwala izintaba nokuhamba emahlathini babe munye nendalo.
“Kuningi okufundayo uma uqwala izintaba njengokukwazi ukukhuluma noMdali ngoba uzizwa usondelene naye. Ufunda nokuzigqugquzela, ikakhulukazi uma usuzwa izinhlungu ezintabeni. Uphinde ufunde nokuhlonipha imvelo nezilwane zasendle ngoba nazo ziyakuhlonipha uma uzihlonipha,” kusho yena.
Okwamanje i-UBH seyihambe izindawo eziningi KwaZulu-Natal. Le ntokazi ithi sebezimisele ngokuyoqwala ngaphandle kwalesi sifundazwe nangaphandle kweNingizimu Afrika.
Ithi miningi imizila yokuguduza emahlathini nokuqwala izintaba asebeyenzile, okubalwa iKenneth Stainbank (eYellowwood Park, eThekwini) ewu-10 km, yiMsinsi Shongweni Dam, uMsinsi Nagle Dam, yiKranskloof eseKloof eThekwini, yi-Oribi Gorge (Port Shepstone), yiGiba Gorge (Pinetown).
“Sisanda kuqwala u-12 km ezintabeni zoKhahlamba (Drakensburg Mountain). Lena yindlela esizilolonga ngayo, sizilolongela iMt. Kilimanjaro (eseTanzania), okuyiyo esiyibhekile. Uma ungumqwali wezintaba kawukwazi ukungafisi ukufika kuyona,” kusho uNoniMuso.
Uthi isifiso sakhe esikhulu wukuba kwande amalungu e-UBH, abantu bangayesabi imvelo. Leli qembu lizimisele ngokuyoqwala izintaba eSwaziland naseLesotho ungakapheli lo nyaka. Isiqubulo salo sithi: “Uma imvelo isibiza, siyalandela”.
UNoniMuso uthi umculo uwufuzo njengoba ethi unina, uNkk Thuleleni Shange, ubecula neqembu iBanana City Sisters. Uthi nguye omgqugquzele ukuba aqophe umculo wakhe alungiselele ukukhipha i-albhamu.
Njengamanje useqalile ukuzakhela igama eThekwini namaphethelo njengoba enandisa ezindaweni eziningi ezidlala umculo we-jazz.
“Isingili yami, iBekezela, ithandwa kakhulu kanti umculo wami uthi mawucishe ufane nokaBusi Mhlongo; ngiyazifela ngaye,” kusho yena. Uthi uzimisele ngokukhipha i-albhamu ungakapheli lo nyaka.