Sekunzima manje ukuba wuthisha
KUSINDA kwehlela kwabathathe ubizo lobuthishela njengoba uya ngokwanda umkhuba wokushaywa kothisha ngabafundi. Othisha balahlekelwa yisithunzi, abanye bashiya umsebenzi ngenxa yokuzizwa bengavikelekile njengoba okwamanje umthetho uvuna umfundi nxa kuvela isimo esinjena.
Esakamuva isehlakalo salo mkhuba senzeke ePolokwane, eLimpopo ngoLwesibili olwedlule lapho abafundi abangamantombazane bevela kwi- video ( ezithombeni ezincane) behlasela uthisha wesifazane.
Kayaziwa imbangela yalokhu kuhlasela kwazise imizamo yokuxhumana nokhulumela uMnyango wezeMfundo eLimpopo, uMnu Sam Makondo, iphunzile njengoba ucingo lwakhe belungabanjwa kwazwe kwashaya isikhathi sokushicilela.
Nokho kunemibiko ethi lo thisha ukhuze omunye walaba bafundi obesebenzisa umakhalekhukhwini ngesikhathi sokufunda kanti useyinyathele emsileni.
ILANGA lixhumane noMnu Allen Thompson, oyisekela-mengameli leNational Teachers' Union (Natu) mayelana nobunzima othisha abangamalungu enyu- nyana yabo abhekene nabo, uthe le ndaba ibuhlungu kabi ngoba yenziwa ngabafundi okumele ngabe kabanakho nokuncane ukudideka ngeqhaza likathisha emfundweni yabo.
Uthe isimo sibatshekele othisha futhi kabathokozile emsebenzini ngoba kabavikelekile. Lokhu uthe kudalwa wukuthi nxa uthisha engathi uyazivikela, ngeke kumlungele ngoba isimo sivuna umfundi okuyothiwa uyahlukunyezwa futhi ukufunda kuyilungelo lakhe.
Uthe ngisho inhlangano yothisha enkulu, iSouth African Council of Educators (Sace), ithula cwaka uma kubikwa lezi zigameko kepha uma uthisha eke waphakamisa uswazi - ejezisa umfundi - kuba yindaba enkulu egxekwa.
UMnu Thompson uqhubeke wathi selokhu kwavalwa ukujezi- swa kwabantwana, beyingakabikhona enye indlela engcono ezosetshenziswa esikhundleni soswazi, kunjalo nje, abafundi sebenomkhuba wokuqoqana uma kuyisikhathi sekhefu noma uma sekuphume isikole, kwakhiwe itulo lokuhlasela uthisha.
“Kuleso simo uthisha akakwazi ukuziphindisela ngoba angase aphelelwe wumsebenzi,” kusho yena.
Uthe beyiNatu, ngokusizwa ngochwepheshe, baphezu komshikashika wokuhlanganisa ibhukwana elizonikeza umkhombandlela maqondana nobudlelwano phakathi kukathisha, umfundi nomzali.
UNkz Nomarashiya Caluza, ongunobhala weSouth African Democratic Teachers' Union (Sadtu) KwaZulu-Natal, uthe inda- ba ilele ekwehlulekeni ukuziphatha kwabafundi. Uthe ubona sengathi ziningi izimbangela zokungalaleli kwabafundi, phakathi kwazo yindlela umntwana akhuliswa ngayo.
Okunye okunomthelela wumoya wokududana ( peer pressure) ngezinto ezingalungile futhi ezingenamqondo.
Utshele ILANGA ukuthi ubona lokhu kungalungiswa yintshukumo ezothinta bonke abantu babambe iqhaza emfundweni yengane ngokuba kunanyathelwe emiyalweni yokuziphatha ethinta abafundi, othisha nesigungu sesikole.
Ukhale kakhulu ngokuyekelela kwabazali ukubamba elabo ichopho emfundweni yomntwana, waphawula nokuthi ngisho imihlangano ebizwa yisikole lapho kungaba nethuba lokubonisana ngengane, abazali bavele bangayi kuyo.
Ucwaningo olwenziwe yiHuman Sciences Research Council, ibambisene noMnyango wezeMfundo ngonyaka odlule kothisha abawu20 000, ezikoleni eziwu-1380 iNingizimu Afrika yonke, luveza ukuthi ingxenye ewu-17% yothisha yabika ukuthi kunezigigaba zokulwa ezifaka phakathi ukusetshenziswa kwezibhamu, kanti ewu13% ikholwa wukuthi khona ezikoleni kunamaqembu ezigelekeqe.
Oyisikhulu esiphezulu kwiNational Professional Teachers Organization of South Africa, uLavender Hill waseWestern Cape, wagwazwa ngumzali ephindela esikoleni.
Kwavela futhi nokuthi othisha abasebancane ngeminyaka yobudala bathi udlame ngesinye sezizathu zokushiya kwabo umsebenzi, hhayi nje ngoba nakhu iholo lilincane.
Okhulumela uMnyango wezeMfundo, uMnu Elijah Mhlanga, ngaleso sikhathi wathi: “Kuba nzima uma (othisha) kumele bafundise becabanga ngokuthi bazozivikela kanjani.”
Nokho kayiphumelelanga imizamo yokuthola ukuthi zimi kuphi izinto manje emnyangweni, ikakhulukazi emuva kwemibiko ngokwenzeke eLimpopo.