UMQEQESHI UKHWELE WADILIKA KWABAGXEKA U-LIONEL MESSI

UJORGE Sampaoli ongumqeqeshi we-Argentina ukhwele wadilika kwabagxeka uLionel Messi ngokushaya into ephansi bebambana ne-Iceland ngo-1-1 ngoMgqibelo kowokuvula kwiNdebe yoMhlaba eqhubeka eRussia.

UMessi bekulindeleke ukuba azishibilikele kalula esiswini kwiIceland njengoba iqala ukubamba iqhaza kulo mqhudelwano. UMessi akadlalanga ngendlela obekulindeleke ngayo, kanti uphinde wageja nephenathi ebizokwenza banqobe ngo-2-1.

UMessi ungene kulo mdlalo enengcindezi njengoba imbangi yakhe, uCristiano “CR7” Ronaldo, ishayele iPortugal amagoli amathathu bedlala ngokulingana neSpain kuba ngu-3-3 ngoLwesihlanu.

“Angihambisani nokuthi kugxekwe uLeo ngokuthi kasiwatholanga amaphuzu amathathu kulo mdlalo. I-Iceland ibivale kanzima emuva, bekunzima ukudiliza udonga lwayo. Kwamina kunzima ukwahlulela uLeo ngezinga lakhe kulo mdlalo. ULeo uhlale ezikhandla njalo lapha eqenjini lesizwe, ngakho-ke makangehlulelwa ngomdlalo owodwa. Nokho-ke ngicabanga ukuthi izinga lethu lizolokhu likhula njengoba umqhudelwano uqhubeka,” kusho lo mqeqeshi.

I-Argentina inomthwalo wokuthola amaphuzu amathathu kwiCroatia ezodudulana nayo ngoLwesine ngo-20h00. ICroatia izongena kulo mdlalo ihambela phezulu njengoba inenebule iNigeria ngo-2-0 ngoMgqibelo ebusuku.

I-Iceland izobhekana neNigeria ngoLwesihlanu ngo-17h00. INigeria yiyona yodwa engenaphuzu kwiGroup D. ICroatia iqhwakele ngamaphuzu amathathu, kanti i-Argentina ne-Iceland banephuzu elilodwa ngokwahlukana.