Uthembisa ezinye izinguquko kumaBoks

Aseqala amalungiselelo eNdebe yoMhlaba

UMQEQESHI wamaBhokobhoko, uRassie Erasmus, usikaza ukwenza izinguquko emdlalweni wokugcina we- test abazowugijima neEngland ngoMgqibelo eNewlands Stadium, eCape Town.

AmaBhokobhoko ahamba phambili ngo-2-0 kwi-England njengoba eseyinqobe yomibili imidlalo ye- test esigijinywe yila mazwe kusuka kobuse-Ellis Park, eGoli, lapho umphumela kube ngu-42-39 kudlula elakuleli kanjalo nakowangoMgqibelo esiphuma kuwona lapho ezika-Erasmus zidlule khona ngo-22-12 eBloemfontein.

AmaBhokobhoko athele muva njengembumba emdlalweni wase- Bloemfontein kwazise ake alandela ngemuva ngo-12-0 emuva kwemizuzu engu-13 nje kuphela umdlalo uqalile. Lesi sikwati senze okufanayo naseGoli njengoba nakhona siqale salandela ngemuva ngo-24-3 kodwa sakwazi ukuphendula amatafula sagcina ngokunqoba.

“Ukulandela ngemuva ngamaphuzu angu-12 kungcono kunokuba ngemuva ngangu-24. Sikwazile ukubuyisa ngokushesha umgqigqo wethu ukunqoba umdlalo. Nakuba siqale senza amaphutha amaningi kodwa abadlali bakwazile ukuziqoqa, sawunqoba umdlalo.

"Okufundwe ngabadlali emaphutheni angeledlule nangoMgqibelo kuzobasiza kakhulu emidlalweni ezayo. Kumele ngikugcizele- le ukuthi kangifuni siphinde siqale kabi ngalolu hlobo,” kusho u-Erasmus ogcizelele ukuthi ngesonto elizayo bazolwela ukunqoba ukuze i-England izobuyela emuva nenduku yombangandlala.

Uqhube ngokuthi kunezinguquko ezizobonakala ngelizayo.

“Sesizokwazi nokusebenzisa abanye abadlali ngoba kasisekho ngaphansi kwengcindezi enkulu,” kusho u-Erasmus ezakhe eseziqalile ukulungiselela imidlalo yeNdebe yoMhlaba yebhola lombhoxo ezokuba seJapan ngonyaka ozayo.

Kulo mdlalo uTendai “Beast” Mtawarira uhlanganise imidlalo engu-100 egijimela amaBhokobhoko.