ISILOMO SE-DOWNS KASIYIZWA EYE-CHIEFS
Sifakwa ugqozi ngowodumo kwiPirates
ISILOMO seMamelodi Sundowns kasiziboni sidlubhe ijezi leKaizer Chiefs okuvela ukuthi isigaqele njengoba isezinhlelweni zokuzama ukubuyisa isithunzi ngesizini ezayo.
UThemba Zwane olihlikihla esiswini kumaBrazilian, utshele ILANGA izolo ngoLwesithathu ekuseni ukuthi akaziphuphi ngisho elele edlala kuMakhosi. Imibiko ibithi iChiefs ifuna ukuhambisa uGeorge Maluleke kwiDowns bese yona ithatha uZwane.
Lo mdlali uthi isifiso sakhe esikhulu wukulibangisa phesheya ngolunye usuku.
“Ngike ngayizwa indaba yeChiefs kodwa kangiziboni nje ngidlala kuyona.
"Ngiseneme kwiSundowns futhi ngisafuna ukuzuza okuningi kuyona.
"Kuningi engikuncela kozakwethu abadala ukukhulisa indlela engidlala ngayo. Isifiso sami esikhulu wukuya phesheya kwezilwandle,” kusho uZwane.
Lo mdlali uveze ukuthi kakusamphazamisi ukuyamaniswa namakilabhu ehlukene.
“Phambilini bekungilimaza ukumataniswa namanye amakilabhu kodwa manje kakusenzi lutho, sengikwejwayele.
Into ebaluleke kakhulu kimina wukuba ngizikhandle ejimini ukugcina indawo yami esikimi- ni,” kusho uZwane ophethe irekhodi lokuthengwa ngemali engaphezulu kuka-R1 million ekubeni edlala esigabeni samaamesha.
Uthi ukuvela kwenani athengwa ngalo kwiValdos FC yaseTembisa eyabe iphethwe nguSinky “Twalaza” Mnisi idlala kwiSafa Gauteng ABC Motsepe League, kucishe kwalimaza ibhola lakhe kwazise abantu bebehlala befuna ukubona lesi simanga sebhola lakhe esenze kwakhishwa izizumbulu ngaye.
“Lokhu kwenza ngazimisela ngokudlulele ejimini,” kusho lo mdlali odabuka eKalambazoo, eTembisa.
Ubonga kakhulu uJerry “Legs of Thunder” Skhosana ozakhele udumo engumgadli we-Orlando Pirates eminyakeni edlule, ngeqhaza alibambile empilweni yakhe, emkhuthaza ukuzibamba ziqine.
UJose Ali Meza waseVenezuela obedlala kwi-Oriente Petrolero yaseBolivia kubikwa ukuthi ujima neSundowns ngenhloso yokusayina kule kilabhu ehlabane ngoToni Silva waseGuinea Bissau. IDowns isiwaqalile amalungiselelo okuvikela isicoco se-Absa Premiership.
UNGAPHUTHELWA yiLANGA
LangeSonto elizokube liqukethe udaba oluconsisa amathe ngempilo kaZwane yangasese engosini iNgaphandle kweNkundla.