U-OJ uyazisola ngokuziphatha budlabha
Ingcabha uyibeka nakubazali babadlali be-PSL
INGCABHA uyibeka kubazali uMbulelo “Old John” Mabizela (37) ophumele obala ngokuthi uyazisola ngokuziphatha budlabha okuholele ekubeni impilo yakhe yasebholeni igutshuzelwe yizigigaba ezingezinhle, ezidale ukuba aphile ngokuxoshwa emakilabhini amaningi awadlalelile eNingizimu Afrika naseEurope.
UMabizela uthathwa njengesitobha ebesinekhono elibabazeka ngokwedlulele kwezikhiqizwe yiNingizimu Afrika eminyakeni ewu-20 edlule, okufakazelwe wukuba ngukaputeni omncane kunabo bonke ukuhola i-Orlando Pirates ngokuqala kweminyaka ka-2000.
Ubuye waqopha umlando ethathwa yiTottenham Hotspur yaseEngland emuva kokuba imbone kanye nje elihlikihla emdlalweni wale kilabhu nePirates obungo-2003 eKings Park Rugby Stadium, eThekwini.
Ubingelele abalandeli beSpurs ngenguzunga yegoli ibhekene neLeicester City. Nokho emuva kwalokho inkontileka yakhe inqanyuliwe esolwa ngokuba yinkathazo njengoba kuthiwa ubebuye angalubhadi ejimini.
Lo mdlali uthi kuzokwenziwa iqophampilo ( documentary) ngaye abuye akhiphe nencwadi lapho ezogonyuluka khona ngakho konke okwenzeke empilweni yakhe, ngaphandle nangaphakathi kwenkundla.
UMabizela uthathwa njengomdlali obeyinkathazo cishe ukubedlula bonke abakuleli kule minyaka ewu-20 edlule. Phambilini uDkt Irvin “Iron Duke” Khoza ongusihlalo wePremier Soccer League (PSL), uzwakalise ukukhathazeka ngokuziphathisa okukajosaka kwabanye abadlali.
Usole izimenenja zabo ngokungabeluleki ukuthi imali iphathwa kanjani njengoba ezwakalise ukuthi ukholwa wukuthi badidiswa yiyona ngoba bengayazi, bese bezibona sebengaphezulu kwempilo uqobo.
UMabizela uthe akakholwa wu- kuthi kumele kugxekwe izimenenja kuphela ngokuziphatha kabi kwabadlali, uthi ngokwakhe ingcabha ikubazali kwazise kayikho indlovu esindwa wumboko wayo.
“Abazali yibona abanamandla ngokugcwele okukwazi ukulawula izingane zabo. Noma ungaba nemali kangakanani kodwa umzali wakho uyakwazi ukukugoba.
“Ngikholwa wukuthi yibona okumele balwe nalokhu, nezimenenja-ke zingasiza nje lapha nalaphaya,” kuphawula uMabizela obecophelela ukuthi akaphahluki ngezinto eziningi njengoba ebegcizelela ukuthi ufuna ukuhluba udlubu ekhasini encwadini yakhe.
Ulibeka angananazi elokuthi kayikho nayinye ikilabhu eyake yamxoshela ukuboza, egcizelela ukuthi uyazazi ukuthi udlala ingcwenga yebhola okufakazelwa wukuthi emakilabhini amaningi ubefika anikwe ibhande lokuba ngukaputeni.
“Okuphazamise kakhulu ikusasa lami ebholeni futhi namanje engizisolayo ngakho yindlela (ebudlabha) engiziphathe ngayo. Nakuba ngingafuni ukwanda ngamaningi ngoba ngizogonyuluka kahle encwadini engizoyibhala ukusiza intsha, kodwa kangiziphathanga kahle,” kusho lesi sitobha esiphuthwe nayithuba lokuhola iBafana Bafana emidlalweni yeNdebe yoMhlaba yeFifa ebikuleli ngo2010, ngenxa yakho belu ukuziphatha kabi.
UMabizela uke wamiswa ukudlala izinyanga eziwu-6 emuva kokubanjwa ukuthi usebenzisa izi-dakamizwa ngesikhathi esemabhukwini eMamelodi Sundowns.
Uhlela nomdlalo wakhe wokubeka amakhokho ethala. Ufisa ukuba incwadi nefilimu yakhe kwenziwe ngabantu baKwaZuluNatal ukubuyisela kubona.
Uthi abanesifiso bangathinta umngani wakhe asebenzisana naye kulokhu, uThapelo Tshabalala otholakala kwezithi: 084 738 9441 (WhatsApp) noma 076 748 4239.
“
Engizisolayo ngakho yindlela (ebudlabha) engiziphathe ngayo. Ngizobhoboka kahle encwadini engizoyibhala ukusiza intsha...