Sekuboshwe abane ngombhikisho eMtuba
Kungqongqiswe amaloli amathathu, bazitapela nokudla
ATHWALE kanzima amaphoyisa izolo eMtubatuba ngesikhathi umphakathi waseMfekayi ubhikisha uvala umgwaqo uN2, ukhala ngezidingo.
Ubukhala ngezindlu okuthiwa wathenjiswa zona, yisiteshi samaphoyisa othi wathenjiswa ukuthi sizokwakhiwa kodwa sashiywa phakathi singaqediwe, amanzi, umtholampilo nokunye.
Kusukela ngoLwesibili lo mphakathi ubuvutha ungabaselwe, uvimba kwasani oludlulayo. Amaphoyisa bekudingeka ukuba ehle enyuka njengoba umphakathi ubusuvale ezindaweni ezimbili ezahlukene. Bekuthi uma ubona inyathi (iloli lamaphoyisa), ubaleke uyovimba kwenye indawo.
Kusukela kuqale lo mbhikisho, kucekelwe impahla, okubalwa amaloli amathathu angqongqiswe ngomlilo, yiguzu lesitimela nalo elivinjiwe lashaywa ngamatshe. Abantu bazitapele nokudla emalolini amabili kwachithwa nomanyolo kwelinye. Zithwale kanzima izikhulu zeminyango ehlukene kahulu- meni ngesikhathi zenza inguyazane eduze nesixuku njengoba umphakathi uvele wavuka indlobane kwaze kwadingeka ukuba ziphelezelwe ngamaphoyisa ukuyohlangana kwenye indawo.
UMnu Vincent Msweli, oyilungu lomphakathi, uthe umphakathi uthwala kanzima uma kumele uthole usizo lomtholampilo noma lwamaphoyisa. Uthe umtholampilo kwakuthiwa uzokwakhiwa ngo-2006 kwangenzeka. “Ngo-2006 kwaphendulwa isoyi satshelwa ukuthi uyakhiwa kodwa namanje akukenzeki.
"Isiteshi samaphoyisa sona siqale ukwakhiwa ngonyaka odlule kodwa yathutha inkontileka ingaqedile umsebenzi, nakhona lapho sangatshelwa lutho. Uma kudingeka siye emtholampilo, sigibela ngo-R12, uma siya emaphoyiseni kudingeka sigibele ngo-R35," kusho yena.
Uthi izindlu nazo zakhiwa yonke indawo kodwa eMfekayi bashiywa ngaphandle. Lokhu uthi kuwucasulile umphakathi yingakho unqume ukubhikisha kuze kube kufika uNgqongqoshe wezokuPhepha koMphakathi KwaZulu-Natal, uMnu Mxolisi Kaunda, owezokuhlaliswa kwabantu uMnu Ravi Pillay, nowezempilo uDkt Sbongiseni Dhlomo.
UMnu Mandla Thusi, naye oyilungu lomphakathi, uthe sekukathathu bebhala uhlu lwezikhalo luhanjiswa kwiziphathimandla kodwa abaphendulwa.Yize lo mbhikisho ubunodlame kodwa izindawo zokungcebeleka eziseduzane, ezikhonzwe yizivakashi okubalwa nesiqiwu iHluhluwe, azizange ziphazamiseke.
UMnu Musa Mtambo, weKZN Wildlife, uthi kayikho imibiko abayitholile ekhomba ukuphazamiseka kwezivakashi. “Ngokujwayelekile uma kube nokuphazamiseka okudalwa yimibhikisho, abantu bayaye bafake izicelo zokubuyiselwa imali yabo, okuyinto ebingakenzeki selokhu kuqale lo mbhikisho," kusho yena.
Kuze kwashaya isikhathi sokuloba izikhulu zingakafiki ukuyoxoxa nomphakathi.
Okhulumela amaphoyisa KwaZulu-Natal, uColonel Thembeka Mbhele, uthe kuboshwe abantu abane kodwa sizokwanda isibalo. Bheka nasekhasini 14