KUSALINDWE IMIPHUMELA YESIDUMBU
UZWAKALISE ukujabula umndeni kaNkz Zolile Khumalo (21), obengumfundi waseMangosuthu University of Technology (MUT), ngesikhathi isoka lakhe elisolwa ngokumdubula limbulale, lenqaba ukufaka isicelo sebheyili eNkantolo yeMantshi yaseThekwini ngoLwesibili.
UMnu Thabani Mzolo (23) waseMdwebu, eMtshezi, ungummangalelwa ecaleni lokudubula abulale uNkz Khumalo waseShowe ngoMbasa (April). Kuthiwa uMnu Mzolo uye lapho bekuhlala khona uNkz Khumalo eLonsdale, ePhoyinti, eThekwini wagila lo mhlolo.
Uvele kafushane kule nkantolo ngecala lokubulala uNkz Khumalo nelokutholakala nesibhamu esingekho emthethweni. Bekugcwele kuchichima enkantolo, kungekho nendawo yokuhlala.
UMnu Comfort Khumalo onguyise kamufi, uthe umndeni ubungafuni vele ukuba (uMnu Mzolo) athole ibheyili ngenxa yento ayenzile enganeni yakhe. “Ngibuhlungu ngendodakazi yami.
"Kuvuka amanxeba njalo uma ngiza enkantolo ngoba ngibona umuntu oyenze into ebuhlungu kangaka. Ngifuna ukuba umthetho wenze okufanele uma inkantolo isigweba uThabani ngenxa yobuhlungu asizwise bona.
"Okubuhlungu wukuthi uThabani akatshengisi ngisho nokuzisola ngakwenzile. Yize ingane yami ingeke isavuka, kodwa ngizothokoza uma ethola isigwebo esifanele,” kusho uMnu Khumalo.
IMantshi Mahammad Motala ithe icala likaMnu Mzolo ilihlehlisela umhlaka-29 kuNcwaba (August), kusalindwe imiphumela yokuhlolwa kwesidumbu, eyolibofuzo ne-albhamu yezithombe. “Ngosuku ozobuya ngalo, ngeke uze enkantolo uzothintwa ngevideo usejele, eWestville,” kusho imantshi.