UVALO NGABAFUNDI ABAVALELWA NGAPHANDLE
INOVALO inkosi yakwaDlamini eMthintanyoni, eHarding, ngabafundi baseCekeza High School ethi bangagcina belalane ezikhotheni ngenxa yokuba wuvanzi, kwazise bayavalelwa esikoleni uma befike emuva kwesikhathi.
INkosi Senzo Dlamini ithi isizame kaningana ukulekelela ukuba kulunge isimo kulesi sikole - ethi izinto zonakele kusona - kodwa abaphathi baso bazithela ngabandayo.
Itshele ILANGA ukuthi lesi sikole kasenzi kahle ngisho emiphumeleni kamatikuletsheni kodwa kusaqhutshekwa kuxoshwa izingane uma zifike emuva kwesikhathi.
“Akusona isixazululo ukuvalela izingane, zikhona ezinye izindlela zokuzijezisa. Ezinye izingane sezifika emuva kwesikhathi ngenhloso ngoba ziyazi ukuthi zizofika sekuvalwe isango bese zibuyela emuva kanti ukuba zicoshiswa amaphepha ngabe nakho lokho kuyisijeziso esihle.
“Sekufike lapho ngikhathala khona manje. Le nto sesigcina siyibuka ngokuthi mhlawumbe kwenziwa wukuthi uthishanhloko akusiyena umuntu wakule ndawo, akanandaba nezingane zethu,” kusho iNkosi Dlamini.
Ithi sekukaningi ixoxa nabaphathi besikole, inxusa ukuba kunqandeke lokhu okwenzekayo, yaze yaphakamisa ukuthi okungenani mababhalwe phansi abafundi abafika emuva kwesikhathi, uma kuze kwaba kathathu umfundi enza okuphambene nomthetho wesikole, yona inkosi izombizela enkantolo yayo nabazali bakhe.
“Izingane ziphithiza ezitolo ngesikhathi sokufunda, ezinye zizoze zilalane ezikhotheni ngoba sezijikisiwe esikoleni,” kusho iNkosi Dlamini.
Okhulumela uMnyango wezeMfundo KwaZulu-Natal, uMnu Kwazi Mthethwa, uthi akukho emthethweni ukuba abafundi bangafundi ngoba kusuke kuchaza ukuthi bancishwa ilungelo labo.
“Ungqongqoshe uhlale esho ukuthi uthishanhloko makabambisane nabazali uma kukhona okumele kulungiswe.
“Ubuholi bomdabu siyabuhlonipha kakhulu futhi siyajabula uma bubamba iqhaza ngoba izikole ngezawo umphakathi,” kusho uMnu Mthethwa.
mthobisis@ilanganews. co.za