IMEYA INXUSE UKUBAMBISANA NABAHWEBI E-ZULULAND
IKHALE ngosomabhizinisi abangasebenzisani nomasipala wayo iMeya yaseZululand, uMnu Thulasizwe Buthelezi, kwazise lo masipala unothe kakhulu ngezobuciko nezolimo.
Ikusho lokhu esigcawini somhlahlandlela wokucobelelana ngezinhlelo zokukhuliswa komnotho nentuthuko ezosimamisa iZululand, esithathe izinsuku ezimbili eNongoma Inn, KwaNongoma.
Besithanyelwe yizithunywa zezinkampani ezinkulu ezizimele, yizimboni zikahulumeni neminyango kahulumeni waKwaZulu-Natal.
UMnu Buthelezi uthe iZululand yaziwa kakhulu ebalazweni laseNingizimu Afrika njengoba inomlando omkhulu ngisho nakwezombusazwe imbala.
Uthe: “Noma iKwaZulu-Natal iyisifundazwe sesibili ngobukhulu kwezomnotho, kodwa siwumasipala kasijabule neze ngoba akukho okutheni okuvela esifundeni saseZululand ekubeni sicebile kwezokuvakasha, ezolimo nezobuciko.
“Sinxusa bonke osomabhizinisi baseZululand ukuba bakhuphule amasokisi, basebenzisane nathi ukuze kwakhiwe ingqalasizinda ezoletha intuthuko emphakathini.”
Nokho kufufuse inhlansi yethemba njengoba emuva kwenkulumo yemeya kuvele izindaba ezimnandi zokuthi abatshalimali beza nolukhulu usizo oluzolekelela ekusimamiseni umnotho waseZululand.
Lezi zindaba zivezwe nguNkk Thokozani Chili oyisikhulu kwiKwaZuluNatal Trade and Investment.
UNkk Chili unxuse bonke osomabhizinisi ukuba basebenze kakhulu namakhosi ngoba yiwona aphethe umhlaba. Amathuba amenyezelwe yiKwaZulu-Natal Trade and Investment yilawa:- Ingqalasizinda ezothuthukisa ezamanzi iZululand yonkana, wukwakhiwa kwezindawo ezizoheha izivakashi eBabanango, KwaNongoma, oNdini, eBaqulusini kuze kuyoshaya eMtubatuba.
Kuzophinde kuvulwe nemayini yamalahle KwaMnyathi eBaqulusini, kube nengqalasizinda ezokwakhiwa KwaNongoma ezobizwa ngeNongoma Infinity Services
editor@ilanganews. co.za