Ufele ugologo owumbombayi
Udutshulwe phambi komfowabo ngoba ekhononda
USEKUBHACENI owesilisa waseSdumbini, eVerulam, ngaseBhamshela, okudutshulwe kwabulawa umfowabo uZamokwakhe Dube (37) (ngokwamaphoyisa una 31) phambi kwakhe kubangwa ugologo owumbombayi ngesonto eledlule, ejoyintini eliseHostela laKwaMashu.
Lesi sigameko sishiye umndeni kamufi uphithene amakhanda, ikakhulukazi umfowabo - ocele ukungadalulwa ngenxa yezizathu zokuphepha - obekhona ngesikhathi senzeka.
Ngokuthola kweLANGA, umufi ubehleli nabangani bakhe nomfowabo khona eHostela KwaMashu ngesikhathi kwenzeka lesi sigameko. Kuthiwa into esuse umsindo wukudayiselwa kwakhe ugologo owumbombayi, okuthe uma yena nabehleli nabo bekhononda ngalokhu, kwabe sebezidonsele amanzi ngomsele.
Umfowabo kamufi, obhacile, uthi akacabangi ukuphindela lapho abehlala khona njengoba abasolwa besagcwele amathafa. Uthi kusekude ukuba sisuke isithombe sokwenzeke kumfowabo odutshulwe amahlandla amathathu ngabesilisa abebekuleli joyinti.
Utshele ILANGA ukuthi abebekufuna nje bona wukwazisa umnikazi wejoyinti ukuthi ubadayisele ugologo owumbombayi kanti bazokwehlekelwa yilo mshophi.
“Ngeledlule sibe nezivakashi nabafowethu, kwabe sekuhlanganiswa imali yokuba kuthengwe ugologo. Siye kwamakhelwane njengoba budayiswa khona utshwala. Sesibuthengile, sikuqaphelile ukuthi lo gologo esidayiselwe wona ubungekho esimeni esejwayelekile, ungezwakali njengowangempela.
“Siphindele khona siyochazela lo mama owudayisayo, sithe uma simtshela, kwaba nokuhilizisana phakathi kwakhe nomfowethu waze wasixosha ethi singaphinde siyothenga kwakhe.
“Sisuke lapho sabuyela endlini, umfowethu wakhipha imali wahamba wayothenga omunye ugologo kwenye indawo. Ngiphindele kulo mama ngiyoxolisa ngoba besingayile ngempi kodwa besiyomazisa ngogologo futhi singasho ukuthi makawushintshe.
“Ngisakhuluma naye, kuqhamuke umfowethu esephethe ogologo ababili ngenhloso yokuchazela lo mama ukuthi kabafani ngempela nalona owakhe.
“Ube wukuqala nje ethi uyakhuluma, kwasukuma omunye wesilisa obehleli kuleli joyinti wabamba umfowethu kabuhlungu entanyeni maqede wagadla ngesibhakela naye umfowethu waphindisela.
“Kusukume abanye bamhlanganyela umfowethu okuthe uma ngisondela, oyedwa wabo wangiphihliza ngebhodlela ekhanda,” kusho yena.
Uthi emuva kokuba bemshaye ngebhodlela, omunye wabo ukhiphe isibhamu wadubula amahlandla amathathu ebhekise kumfowabo.
“Esedutshuliwe, uphuthunyiswe emtholampilo oseduze kodwa washonela endleleni. Nakhona emtholampilo sifike bakuqinisekisa ukuthi useshonile,” kusho yena.
Uthi kuyimanje usekubhaceni ngoba akazi noma abasolwa bazobuya yini bazoqedela abakuqalile ngoba ubekhona kwenzeka konke lokhu.
Ufuna kwenzeke ubulungiswa ngokufa komfowabo. Okhulumela amaphoyisa KwaZulu-Natal, uCol Thembeka Mbhele, usiqinisekisile lesi sigameko wathi kuvulwe icala lokubulala kodwa kakuboshwa muntu.
Uthe imbangela yokubulawa kukamufi ibingakaziwa.