Usebuyiselwe emsebenzini obekuthiwa udlwengule isiguli
Ufuna umnyango umnxephezele ngokumhlambalaza, umholele nale minyaka abeyihleli
ULENGELA engcupheni yokudliwa izishaqane zemali uMnyango wezeMpilo KwaZulu-Natal, njengoba ILANGA lithole ukuthi uMnu Sandile Buthelezi wasoGunjini, oSindisweni, eVerulam, oxoshwe esibhedlela sasoSindisweni ngoba esolwa ngokudlwengula isiguli, ufuna ukuba umnxephezele.
UMnu Buthelezi oyinesi, ubuyiselwe emsebenzini ngeleldlule emuva kokuhlala iminyaka ewu-6 ejika nelanga ngoba kuthiwa udlwengule isiguli esigula ngengqondo.
Ngokuthola kweLANGA, uMnu Buthelezi uxoshwe ngoZibandlela (December) wango-2011 emuva kokuba lesi siguli sibikele abaphathi ukuthi usidlwengulile.
Kakuphelanga sikhathi esingakanani, zamkhalela nomnyango wezempilo wamxosha ngokushesha, kungazange kwenziwe nophenyo lwangaphakathi.
Ngo-2013, uMnu Buthelezi uphume phambili ecaleni abebhekene nalo kodwa ngenxa yomdonsiswano nomnyango, kuthathe isikhathi ukuba abuyele emsebenzini njengoba eze wabuyela ngeledlule.
Umthombo weLANGA osondelene kakhulu noMnu Buthelezi, uthi ujabule kakhulu yena nomndeni wakhe ngokuthi ekugcineni useze wabuyela emsebenzini yize enezimfuno okumele zifezwe, okubalwa isixoliso somnyango emphakathini.
Umthombo uthi nabanye abahlengikazi bese benengekile ngese-nzo somnyango sokungambuyisi emsebenzini yize ephume phambili ecaleni.
Kuthiwa bese kunekhasi ezinkundleni zokuxhumana obese kuphushwa kulo umkhankaso wokuba abuyele emsebenzini.
“UButhelezi uhlale ejele isikhathi esingangenyanga ngaphambi kokuba athole ibheyili.
"Emuva kokuphuma kwakhe, impilo ibinzima ngoba abantu, ikakhulukazi izingane, bebembalekela uma bembona kwazise udaba lokuxoshwa kwakhe emsebenzini luphume ngisho komabonakude nasemaphephandabeni.
"Umnyango uvele wamxosha engakalahlwa ngisho nayicala, kangangoba incwadi ebimxosha wahanjiselwa yona esesitokisini. Uqhubekile wahamba icala, okuthe ngo-2013 waphuma phambili.
"Kusukela ngaleso sikhathi, ubelokhu elwa indaba yokuba abuyele emsebenzini. Abekufuna wukuba anxeshezelwe ngokuhlanjalazwa kwabezindaba, wukukhokhelwa imali yale minyaka abeyihleli ekhaya nokuba umnyango ukhiphe isixoliso emphakathini ukuze kuzogezeka igama lakhe,” kusho umthombo.
Umthombo odonse intatheli ngendlebe ukuba ingawudaluli, uveze ukuthi isimo bese singesihle kuMnu Buthelezi njengoba ubesebamba noma yimaphi amatoho nje- ngoba ubeseke wasebenza nakwesinye sezitolo zefenisha. Ngaphambi kwalokho, umthombo uthi uMnu Buthelezi uthole umsebenzi kwenye ifemu, okuthe uma kuputshuka ukuthi uke wasolwa ngecala lokudlwengula, waxoshwa.
ILANGA limthintile uMnu Buthelezi wakuqinisekisa ukuthi usebuyelile emsebenzini. Akathandanga ukuqhubeka aphawule kakhulu ngalolu daba njengoba ebethi selukummeli wakhe kwazise kusenezingxoxo eziqhubekayo.
Okhulumela uMnyango wezeMpilo KwaZulu-Natal, uNkz Ncumisa Mafunda, uthe: “Umnyango ungakuqinisekisa ukuthi isisebenzi okukhulunywa ngaso sesibuyele emsebenzini kusuka ngeledlule.
"Umnyango ngeke ukwazi ukuba uphawule ngezinye izinto eziphakathi kwesisebenzi nomqashi.”
Impilo ibisinzima kuyena kwazise nezingane bese zimbalekela uma zimbona.