Unikelele izingane ezihlwempu
OweBloemfontein Celtic ukhumbule ekhaya
UKHOHLWE wunobhutshuzwayo wakhumbula ekhaya umdlali wasesiswini weBloemfontein Celtic, uMenzi Masuku, ngesikhathi enikelela abafundi abahlwempu baseNgazana Primary School, KwaMashu, ngomfaniswano nezicathulo zesikole.
UMasuku, ozakhele igama egijima kwi-Orlando Pirates nakwiChippa United ngaphambi kokuya kwiCeltic, unikelele abafundi abangaphezu kuka-30 kulesi sikole afunde kusona, esebenzisa inhlangano yakhe engenzi nzuzo, iMasuku Legacy Foundation.
Kulesi sikole uye ephelezelwa ngu-Andile "Carrot" Fikizolo weLamontville Golden Arrows noThamsanqa Mkhize weCape Town City.
Ekhuluma neLANGA uMasuku, uthe: "Isifiso sami wukuba lokhu ngikwenze minyaka yonke ukuze kuhlomule izingane ezihlwempu, zigqugquzeleke ukuya njalo esikoleni".
Uthishanhloko waseNgazana, uNkz Ntombeningi Majola, uzwakalise enkulu injabulo ngesenzo sikaMasuku, wathi kuyabajabulisa ukuthi umuntu obefunda kulesi sikole abone kukuhle ukuphonsa itshe esivivaneni, kwazise abanye abantwana badonsa kanzima.
UMasuku ngomunye wabadlali abebethembisa ngesikhathi eqala ukubonakala kwiPirates kwazise ubengayibheki inethi yize engumdlali wasesiswini.
Kubadlali abancane bekunguyena noGift Motupa obekunethemba lokuthi bazokhulela kuleli qembu balenzele izimanga.
Nokho ubone kwabezindaba ukuthi usengumdlali weChippa, okuvele izindaba zokuthi uzame ukutabalasa, engafuni ukuya kuyona.
Lugcine lugobile uphondo.
Ikhono lakhe limphendlele indawo esikwatini sika-Under 20 nakuUnder 23 lapho abegijima khona noMotupa, Sphelele "Stash" Ntshangase weKaizer Chiefs, Phakamani Mahlambi obekwiBidvest Wits ngaleso sikhathi, ukubala abambalwa.