Uqinisekisa ukuphepha kwabagibeli bezindiza
UFUNA umuntu ohlale ecabanga ngokukhulu ukushesha uLieutenant Sanele Ndaba (28), oyi-Air Traffic Controller (ATC) ngaphansi kweSouth African Air Force (SAAF), esikhumulweni sezindiza zombutho wezempi esiseLangebaan, eWestern Cape, ngoba ukucabanga kancane kungaholela kwenkulu inhlekelele.
Umsebenzi wale nsizwa ezalwa eLimit Hill, eMnambithi wukuqinisekisa ukuthi amabhanoyi ahamba ngemizila efanele, kawashayisani. Iqinisekisa nokuthi amabhanoyi ombutho wezempi waseNingizimu Afrika nathwala abagibeli, aphephile.
Ifunde amabanga aphansi e-Egerton Primary School khona eMnambithi, yaqeda umatikuletsheni eLadysmith High ngo-2008. Isuke lapho yaphikelela eDurban University of Technology (DUT), lapho yenze khona i-Electrical Engeneering Heavy Current.
“Ngifunde iminyaka emibili ngangaqeda ngoba besengifuna ukuyongena emkhakheni wezokuvikela izwe lapho ngifike ngaqeqeshwa khona kwiMastering.
“Ngemuva kwalokhu kuqeqeshwa, ngenze izifundo ezahlukene ngaphansi kweCommand and Control, okuyilapho ngikhethwe ukuba ngingene ngaphansi kohlaka olubizwa ngeCommand and Control,” kusho yena.
Uthi ube eseqeqeshelwa ukuba yiTelecommunications Operator, okuyilapho ekhethwe khona nabanye abambalwa baqeqeshelwa ukuba yi-ATC.
“Ukwenza umsebenzi wokuba yiATC ngikufundele eCommand And Control School eseHoedspruit, eLimpopo izinyanga eziwu-18. Ngibe sengivivinyelwa lo msebenzi ( practicals) ngaphambi kokuba ngiqede izifundo ngokugcwele,” kusho yena.
Uthi eCommand and Control School izifundo abezenza yi-Air Space Primary 1 ethathe izinyanga ezintathu, yiCore Content ethathe izinyanga eziwu-6, yi-Aerodrome Control ethathe izinyanga ezintathu wabe eseya embhoshongweni (tower) eseyovivinywa.
Ngaphansi kwalezi zifundo uthi bafunde ngeSearch and Rescue, yiEmergency Procedures, yiNavigation, yi-Airspace Management nokunye okuningi okubalwa isimo sezulu. Uma efika emsebenzini wakhe uthi kubalulekile ukuqala abheke amabhonoyi asemoyeni ukuthi ahamba ngemizila efanele yini, aqinisekise nokuthi usiqonda kahle isimo sezulu ngalelo langa.
“Sisebenzisana kakhulu neCape Town International Airport (CTIA), uma ibhanoyi lisuka khona, kuwumsebenzi wethu ukuthi uma selisemoyeni - endaweni elawulwa yithina - silinikeze umzila okuyiwona,” kusho uLieutenant Ndaba.
Uthi indlela elula yokuchaza umsebenzi wakhe, wukuthi bayafana namaphoyisa omgwaqo, umehluko wukuthi bona basebenza emoyeni.
Uma kungena ibhanoyi elingaziwa - okuyinto athi ijwayele ukwenzeka - uthi kubalulekile ukuba bafune baze bathole ukuthi lihamba bani futhi liyaphi ngoba basuke bengeke bakwazi ukuqinisekisa ukuphepha kwalo uma bengalazi.
“Ngoba siphinde sivikele nezwe, kubalulekile ngaso sonke isikhathi ukuthi silazi ibhanoyi elingena emzileni,” kusho yena. Njengoba engaziqedanga izifundo zakhe zeElectrical Engeneering eDUT, uthi ngonyaka ozayo uzimisele ngokuziphothula athwale iziqu zakhona ngoba umbutho abawusebenzelayo uyaku-khuthaza ukuthi kumele bafunde.
“Bayasinika nemali yokufunda futhi kangiyena umuntu othanda ukushiya izinto phakathi, ngakho-ke ngikubone kubalulekile ukuqedela izifundo zami. Lokho ngeke kungisize njengoba ngisebenza kulo msebenzi engikuwona manje, kodwa
ku-zongivulela amathuba kuwona umbutho ngikwazi ukusebenza nakwezinye izinhlaka,” kusho yena.
Uthi okuhle ngalo mkhakha akuwona wukuthi abantu abamnyama bakhona futhi baningi nabesifazane. Le nsizwa inendodakazi eneminyaka ewu-7 ubudala, uLwandle kanti kayishadelwe.
Ithi abazali bayo, uMnu Bernard noNkk Nomvula Ndaba, bayeseka kakhulu futhi bayaziqhenya ngayo.