Ayikaphumi kwelabagula kakhulu i-Eskom
Izinkinga eziningi zidalwa wukubhajwa kwezinkampani zikahulumeni kunoxhaka oyi- state capture
NGOKWENCAZELO yesizindalwazi ( website) sakwa-Eskom, lena yinkampani kahulumeni eyasungulwa ngo-1923 wuhulumeni womhlabuhlangene (Union of South Africa) njengoba yayibizwa kanjalo iNingizimu Afrika ngaleso sikhathi.
Yasungulwa ngoMthetho Kagesi (Electricity Act) ka-1922, yethiwa elithi yi-Electricity Supply Commission (ESCOM).
Ngesikhathi kungena uhulumeni wentando yeningi, isethembiso sokuphakela wonke umuntu ugesi kwakhankasa ngaso amaqembu ezombusazwe, okwabangela ukuba ukusetshenziswa kwawo kwenyuke kakhulu esikhathini esifushane.
Ngasekupheleni kweshuminyaka lika-1990, ochwepheshe beluleka uhulumeni ukuba uhlinzeke isabelo-mali sokwandisa iziteshi zokuphehla ugesi. Leso sicelo sachithwa wuhulumeni ngaleso sikhathi owabe uholwa nguMnu Thabo Mbeki.
Kamuva ngoZibandlela (December) 2007, emuva kweminyaka esondele kwewu-10, uMnu Mbeki walivuma iphutha likahulumeni lokuchitha leso sicelo, waxolisa esizweni.
Ngo-2008, izwe lihlangabezane okokuqala nesimo sikagqamcishi, okusho uhlelo lokucinywa kukagesi ngokudedelana ( rotational load-shedding) ukuze umphakathi wabelane ngenkeshezana kagesi okhona ezweni.
Kwacacela ne-ngane ezelwe ukuthi nakanjani umnotho wezwe yiwona olimala kuqala nxa kuba nesimo esinjalo.
OKWENZEKAYO MANJE
Ezakamuva zithi ukucinywa kukagesi okuhleliwe sekuyayiphinda iNingizimu Afrika njengoba kuthe ngempelasonto edlule abakwa-Eskom baqalisa lolu hlelo okwesikhashana. Encazelweni yabo bathe lokhu kube ngenxa yokuba kunezenzo zokwesabisa nokuvukela inkampani njengoba kunesiteleka sezinyunyana kwezinye iziteshi.
Isiteleka sibukeka siwusawoti enxebeni ngoba sekuyinto eyaziwayo ukuthi ukuphathwa budlabha kwale nkampani isikhathi esithi masibe yiminyaka ewu-10 edlule sekwenze i-Eskom yafana nompompi ovuzayo onganakiwe njengoba bekubhubhudlwa imali yayo ngenxa kanoxhaka wenkohlakalo ekuhulumeni waleli lizwe, u-Adv Thuli Madonsela, obengumvikeli womphakathi phambilini - ayethe ngelithi state capture.
Lokhu kugcizelelwe nangumholi weDemocratic Alliance (DA), uMnu Mmusi Maimane, esigcawini sabacosheli bezindaba kuthangi lapho elibeke ngembaba elokuthi ukubisha kwale nkampani kungenxa yawo lo noxhaka oyi- state capture.
Uthe ukucinywa kukagesi izikhawu okuhleliwe, kakuvelanga kwaqhibuka nje kuhle kwekhowe ngenxa yezingxoxo ngamaholo, kodwa umongo wenkinga usemlandweni wokubhajwa kwezinkampani zikahulumeni kunoxhaka oyi- state capture.
UKUPHAWULA KONGOTI
USolwazi Bongiwe Mayaba, weBMM Incorporated, uthe naphezu kwezinguquko ezenziwe nguMengameli Cyril Ramaphosa ezikhulwini zebhodi eyengamele izindaba ze-Eskom, nokho kayikaphumi “egunjini labagula kakhulu”.
Uthe umonakalo osuthathe isikhathi esingaphezulu kweminyaka ewu-10, kawukwazi ukulungiseka inkampani iphile qingqo ngezinyanga eziwu-6 kusukela uMnu Ramaphosa engenile esikhundleni sokuba ngumengameli.
Okunye futhi wukuthi i-Eskom lena iphila ngokuboleka na- ngokukhuphula amanani okuthengwa kukagesi.
Okuwukuthi ukuze uyifunde ivaliwe, umphakathi kumele ulamukele iqiniso elibabayo elithi isamba esiwu-R5 billion esabolekwa esikhwameni sempesheni yezisebenzi zikahulumeni, iPublic Investment Corporation (PIC), empeleni k wa k u ngeso k u t a kulale nkampani, nokusho ukuthi akubonakali leyo mali ibuyiselwa ngoba akekho owaziyo ukuthi i-Eskom iyokwazi nini ukwenza inzuzo.
USolwazi Bonke Dumisa naye uhambe emazwini kaSolwazi Mayaba okuthi i-Eskom lena ngeke yelulame njengamanje. Uzwakalise ithemba lokuthi nokho uma kukhona okutholakalayo ethubeni lezingxoxo zamaholo ezisebenzi no-Eskom - elivulwe kabusha nguNgqongqoshe wezamaBhizinisi kaHulumeni, uMnu Pravin Gordhan - inkinga kagqamu-cishi kagesi ingase yedlule maduze.
Uthe lokhu kuyoncika ekubeni izinhlangothi ezixoxayo zikuqonde futhi zikwamukele ukuthi amanani angenelelayo ekunqunyweni kwawo uhulumeni, phecelezi administered prices, kakuvumelekile ukuba abe ngaphezulu kwezinga lokwehla kwamandla emali ( inflation) ngoba lokho kubhebhezela yona i- inflation.
Ngakho iqophelo lika-4,7% lokwenyuswa kwamaholo elibekwe etafuleni yi-Eskom, kumele balicubungule ngokucophelela.
Ukhale ngokuthi kuyishwa ukuthi nxa kukhona abafuna amalungelo abo, lokho bakwenze ngendlela okugcina kunyatheleka ngayo amalungelo abanye.
Wenze isibonelo ngokuthi nxa izisebenzi zigodla amandla emsebenzini ofana nowenziwa yiEskom, isibonelo sokunqamuka kukagesi singaholela ekubeni ezindaweni zokwelapha kube nabafayo uma imishini icima.
Uthe yingakho nje sekuyimpoqo ukuba uma kwakhiwa isibhedlela, kube khona injini yokuhlinzekela izimo ezinjalo, imele ugesi.