Abesifazane sebe y o bhu qwa bhu qwa ngamakhaza kuze kuphele iWorld Cup indoda ibhizi neTV
ABESIFAZANE kuyomele bavumbulule lezi zindukwana zabo zokuzikitaza ngoba phela wonke amadoda aseshade nomabonakude kwazise iFifa World Cup isiyafudumala.
Phela uma iGermany ishaywa yiMexico, kusho ukuthi izinto zishubile, kakudlalwa lapha kuyadlalwa. Iningi lalabo abesaba abafazi babo selinyamalele, umuntu useyothushuka emuva komdlalo wamanqamu ethi ubethunjwe yidlozi eyothwasa emfuleni thize.
Amanga-ke anendlela yokumembula izinqe umuntu, iqiniso lizivelele obala kuhle kwento yembuzi. Umfazi uyoxakeka nje ezwa ubaba wekhaya esexoxa, ekhipha imininingwane ngemidlalo yayo phela iWorld Cup lena, kodwa ebe ethe ubesemfuleni uThukela.
Nezingane ziyombuza ukuthi kanti akhona yini amadlozi ano- mabonakude, nokuthi ugesi uyahlangana yini namanzi njengoba ethe ubesesizibeni.
Kuyothi uma sekuvela izitatimende zasebhange, kubonakale imali yamathikithi ebhanoyi, imali ekhokhelwe amahhotela lena eRussia, eyeziphuzo nokudla, izilume ulimi indoda izama ukuchaza okungachazeki uma esebuza umfazi ukuthi kanti umfula uThukela useRussia yini njengoba yena wawugcina uKwaZuluNatal.
Phela akhona amadoda anyamalalayo njalo ngosuku lokuhola, aze abonwe emuva kwesonto, ebese ethi athathwe yikheshi edakiwe.
Ngikhumbula si s akhula, ngiseyibhobhodlana, ngizwa kuthiwa omunye ubaba esasakhelene naye uthathwe yikheshi wabuya ekhaya emuva kwezinsuku ezimbili esephelelwe yimali.
Ngathi uma ngibuza ukuthi yini ikheshi, ngatshelwa ukuthi yisipoki esithatha abantu siyobalahla kude lena lapho sithanda khona.
Yize ngangiseyingane, ngamane ngayihleka nje le mbudane ngoba yayenzeka kobaba abaphuzayo kuphela. Kusho ukuthi phela lezi zipoki ezithatha abantu zithanda utshwala, futhi zithanda ukudla imali yezidakwa. Ngeke ngimangale nje uma omunye walaba abanyamalele esevela kumabonakude kwezinye zezinkudla zebhola eRussia, eseshaya lokhu okuthiwa phecelezi yiMexican wave
Livele ehleli eduze kwesimomondiya se- yellow bone, athi uma esequliswa icala, esebuyile ekhaya, athi wathathwa yikheshi layomlahla eRussia. Uyothi yilo futhi elimnike nale ntokazi abonwe nayo, kodwa yena akasakhumbuli lutho.
Thina esaganwa kahle, simane sabatshele nje omama basekhaya ukuthi sicela ukungaphazanyiswa uma sibukela imidlalo.
Ngeke sithi sibadala kangaka, siqale ukuqamba amanga njengezingane. Kumele phela bazi kahle ukuthi uma bevukwa yinkanuko kudlala umdlalo, sekuyomele bazikitaze noma balinde-ke uma kulindeka.
Bangazithola benethuba-ke uma kudlala la maqembu antengantengayo, kodwa-ke kumele nalapho babe nethayimingi ukuze kungaxatshanwa.
Phela nemidlalo ebengingacabangi ukuthi izoba sezingeni eliphezulu, ihlabe umxhwele, ngagcina sengibukela ngingaqondile. Amaqembu aphethe izihlabani, afana neBrazil, i-Argentina neGermany, athole kanzima ukuthi umqansa uyenyuka, akubhenywa nyawope la.
Amaqembu angaziwa afana neIceland, nawo aye eRussia ehlomile futhi ezimisele, agadla kwe- zwakala. INigeria yona iye idle ukotini, abadlali begqoke beconsa befaniselene okwamawele, yakhohlwa ukuthi akusiwona umbukiso wemfashini lona.
Abantu abakhombise ukuthi bayayazi into abayiyele eRussia, kube yiPortugal neSpain. Ubungafunga ukuthi bebedlala owamanqamu. Bengiya eFree State ngoMsombuluko uma ngihlangana nensizwa ebicela ulifti eceleni kukathelawayeka, uN1 Highway, iphethe uqwembe obelubhalwe “Russia”.
Ngithe mangimise imoto ngiyibuze ukuthi iya kuphi neRussia. Ithe yona yazi laba bantu okuthiwa ngamaRashiya beliqhamukisa eLesotho, ngakho ngingayehlisa noma yikuphi uma nje sesingenile kwelikaMoshoeshoe.
Ngithe uma ngibuza ukuthi kungani ingaphethe zimpahla zokushintsha, yathi ibalekile ekhaya, yathi isiyolithetha livuthi-