Bafe olwembiza abadayisi beTheku
Bakhala ngokuphucwa iqatha emlonyeni
BAKHALA ngokuphucwa isinkwa abadayisi ababalelwa ku-120 abangekho emthethweni ngaphansi kukaMasipala weTheku emuva kokuba kuthe ngoMsombuluko amaphoyisa kamasipala aphuma inqina ebathungatha, athatha nezinqola zabo.
Bathi umasipala uthe lezi zinqola zabo zibanga udoti edolobheni. Ngawo uMsombuluko ekuseni bahlangane epaki engaseCity Hall, naseKing Dinuzulu Park khona eThekwini, bebhunga ngalolu daba.
UMnu Mbuso Gumede (36), ohlala eMlazi, obehlele lo mhlangano - osedayise iminyaka ebalelwa ku-15 emigwaqweni yeTheku - utshele ILANGA ukuthi akwenziwe yilo masipala uyokuxoxela amagwababa echobana.
“Okusethuse kakhulu wukuzwa ngabantu ukuthi sizosuswa emigwaqweni, kuthiwa izinqola zethu ziwudoti ongcolisa iTheku. Nathi sizama impilo, kasinqabi ukwenza izicelo zezimvume zokudayisa, abanye bethu bayazenza kodwa zigcine zingaphumanga. Ngaleso sikhathi umndeni udinga ukudla, nezingane zidinga ukuya esikoleni,” kusho uMnu Gumede.
UNkk Nontobeko Zondi (40), ofika edolobheni ngabo-05h00 agoduke ngo-7 ntambama, uthi kuzoba nzima ukuba ayeke ukudayisa ngoba yiyona indlela aziphilisa ngayo le, emsiza ukondla amalungu omndeni wakhe amane. Kuyimanje kunengane ayifundi- sayo enyuvesi ngemali ayithola ngokudayisa.
“Ngesaba nokutshela izingane zami ngalesi simo. Kusho ukuthi wukuphela kwempilo yami lokhu. Uma bekhankasa bafika kithina ngqo, ngiyethuka uma sesizwa ngabantu, sibona nasemaphepheni ukuthi sizoxoshwa ngoba kuthiwa singcolisa iTheku ngodoti wethu,” kusho yena.
IBamba lokhulumela uMasipala weTheku, uMnu Mandla Nsele, lithe lolu hlelo - lokuxoshwa kwabadayisi abangenazimvume - lwenze umehluko omkhulu njengoba amadolobha afana neSphingo neTheku, udoti odalwa yilaba badayisi ubungabonwa.
“Amaphoyisa abephume ngobuningi bawo ukuqinisekisa ukuthi konke kuhamba ngendlela. Siyacela abantu balandele umthetho kamasipala ukuze bengagcini sebebhekene nengalo yomthetho,” kusho uMnu Nsele.