UHLONGOZA IZINGUQUKO OWE-ARGENTINA
UTHEMBISA izinguquko uJorge Sampaoli ongumqeqeshi we-Argentina ezodudulana neCroatia emdlalweni wesibili kaGroup D kwiNdebe yoMhlaba namuhla ngoLwesine ngo-20h00.
Lo mdlalo uzocacisa okuningi ngekusasa le-Argentina kulo mqhudelwano njengoba ivule ngenothi eliphansi ibambana neIceland ngo-1-1 ngempelasonto. USampaoli uthe uzokwenza izinguquko kowanamuhla. Kuthiwa angase abophele uCristian Pavon endaweni ka-Angel Di Maria ukuze bahlasele mawala. UGiovani Lo Celso weParis Saint-Germain yaseFrance, kuthiwa angase aqale endaweni kaLucas Biglia esiswini. Kuthiwa uSampaoli uhlela ukuba laba badlali batshalele uLionel Messi ( osesithombeni) noSergio Aguero amabhola axoxa indaba ukuze bahlohle amagoli. U-Aguero nguyena ovalele igoli i-Argentina ibambana ne-Iceland. Kulindeleke ukuba i-Argentina idlale ngohlelo lwe-3-3-3-1 ukuze ithole amagoli.
UMessi ushaye into ephansi emdlalweni ne-Iceland eqalayo ukubamba iqhaza kwiNdebe yoMhlaba. Lesi silomo esigijima kwiBarcelona yaseSpain, sigeje nephenathi ebizokwenza i-Argentina inqobe ngo-2-1.
Abadlali base-Argentina baphumele obala ngokuthi bazokufa naye uMessi. UPaulo Dybala uthe banethemba lokuthi uMessi uzozijika izinto emdlalweni wanamuhla.
“Okuhle wukuthi uyazi ukuthi simeseka sonke ekhempini. Uma esekwa yithina esidlala naye, akukho okuzomphazamisa. UMessi ungumdlali wezinga eliphezulu. Sithembele kakhulu kuyena, kanti naye uyasethemba,” kusho lo mdlali ogijima kwiJuventus yase-Italy.
UCristian Ansaldi odlala emuva kwi-Argentina, uthe uMessi umqoka kakhulu esikwatini sabo.
“Sonke siyazi ukuthi uMessi ubaluleke kakhulu esikwatini sethu nasezweni nje jikelele. Akagcini ngokuba ngumdlali omuhle enkundleni, kodwa nangaphandle kwayo kuningi asisiza ngakho. Sijabule ngoba akagebisanga ikhanda sibambana neIceland. Nguyena osigqugquzelayo, futhi sizomulwela,” kusho u-Ansaldi ogijima kwiTorina yase-Italy emboleke kwi-Inter Milan yakulona leliya lizwe. ICroatia izongena kulo mdlalo inamaphuzu amathathu emgodleni wayo njengoba inenebule iNigeria ngo-2-0 ngempelasonto edlule. ICroatia yiyona ezihola phambili ngamaphuzu kwiGroup D.
Uhlu lwemidlalo yeNdebe yoMhlaba ezogijinywa kusuka namuhla ngoLwesine kuya ngeSonto ludidiyelwe kanje:NAMUHLA NGOLWESINE Denmark vs Australia 14h00. France vs Peru 17h00. Argentina vs Croatia 20h00. KUSASA NGOLWESIHLANU Brazil vs Costa Rica 14h00. Nigeria vs Iceland 17h00. Serbia vs Switzerland 20h00. NGOMGQIBELO Belgium vs Tunisia 14h00. Korea Republic vs Mexico 17h00. Germany vs Sweden 20h00. NGESONTO England vs Panama 14h00. Japan vs Senegal 17h00. Poland vs Colombia 20h00.
Le midlalo iboniswa bukhoma kwiSABC 1, kwiSS3 nakwiSS10.