ABE-SUPER EAGLES BAKHAHLELA EYOKUHUDULA IZINYAWO
KUCHITHWA eyokuhudula izinyawo kubadlali beNigeria eyivule kabi imidlalo yeNdebe yoMhlaba inenebulwa yiCroatia ngo-2-0 ngempelasonto edlule.
Kunezinsolo zokuthi abadlali beNigeria bamadolo nzima ukuzinikela ngenxa yokungacaciswa kwamabhonasi abazowathola ngokumela izwe kulo mqhudelwano. INigeria inomdlalo omqoka kusasa ngoLwesihlanu njengoba iqhathwe ne-Iceland ngo-17h00.
UBarrister Seyi Akinwunmi oyisekela lokuqala likaMengameli weNigeria Football Federation, uthi baye kulo mqhudelwano lucacisiwe uhlelo lwemihlomulo yabadlali.
“Kungamanga aluhlaza ukuthi abadlali bethu bahudula izinyawo. Size kulo mqhudelwano betsheliwe ukuthi imali yabo bazoyithola ngemuva kwemidlalo yamaqoqo. Bayazi ukuthi kumele banqobe kusasa nasemdlalweni wokugcina wamaqoqo ukuze bathole imihlomulo ebhekile. Uma nje bekwazile ukufinyelela kwi-last 16, bayakwazi abazokuthola. Imihlomulo yabo kakuyona eyomdlalo ngamunye. Ibekwe ngokwezigaba ezahlukene,” kusho u-Akinwunmi.
Uthi balindele amaphuzu amathathu emdlalweni wakusasa.
“Sonke sidumele ngokuvula ngenduku. Siyazi ukuthi lo mphumela ubacikile abantu baseNigeria.
"Nokho-ke abafana bazimisele, futhi nabo basithembisile ukuthi bazobuya namaphuzu aphelele kusasa. Sibonga kakhulu uBarrister Solomon Dalung onguNgqongqoshe WezeMidlalo eNigeria. UDalung uncamele ukuhlala nathi lapha eRussia ukuze eseke abafana kule midlalo emibili esele.
“Besiholwa nguyena nasemdlalweni wokuqala. Abafana bayakhuthazeka kakhulu ngokuba khona kwakhe. Uxhumane noMuhammadu Buhari onguMengameli waseNigeria ukuze akhulume nabafana. Inkulumo kaBuhari ibakhuthaze kakhulu abadlali bethu. Sijabule kakhulu ngokwesekwa wuhulumeni wethu,” kusho u-Akinwunmi.
UDalung usewe evuka neSuper Eagles njengoba ebehamba nayo ngisho emidlalweni yokuhlunga. Nguyena obeyihola iyodlala eZambia naseCameroon, kanti ubekhona kuyona yonke imidlalo yasekhaya abayidlale ne-Algeria, iCameroon neZambia.
INigeria izosuka namuhla eStavropol isibheke eVolgograd lapho izodudulana khona ne-Iceland. Lo mdlalo ngeke ube lula kwiSuper Eagles njengoba i-Iceland imangaze abaningi ibambana ne-Argentina kuba ngu-1-1 ngeledlule. Bekubhekwe ukuthi i-Argentina inqobe ngumbudlu kulo mdlalo, kodwa kakwaze kwenzeka.