Kumqinise ukhakhayi ukuxoshwa yiPirates
Akayibambele igqubu ngokumchitha engazelele
UDALULE ukuthi kumqinise ukhakhayi ukuxoshwa yi-Orlando Pirates uMenzi Masuku ongumgadli weBloemfontein Celtic esanda kwethula uSteve “Mphathi” Komphela njengomqeqeshi wayo omusha.
UMasuku ungene ngelikhulu ishodi ebholeni elikhokhelayo edlala kwiBucs nakumaJita (SA U/20).
Nokho uxoshwe engazelele ehambe namaJita njengoba ebuye esetshelwa ukuthi kumele ayojoyina iChippa United asuke kuyona walibangisa kwiCeltic.
Lo mdlali odabuka KwaMashu, enyakatho yeTheku, utshele ILANGA ukuthi akayibambele igqubu iPirates ngokumxosha kabuhlungu, kwazise ukuhamba kuyona kumqinise kakhulu ukhakhayi.
“Nakuba sengiwumdlali weCeltic kodwa kuningi engikufunde ngidlala kwiPirates, abadlali bayo abadala bangakhile,” kusho lo mgadli.
Udalule ukuthi unezifiso ezinkulu njengoba esalubalubela nokunqoba isicoco se-Absa Premiership ngolunye usuku kanjalo nokugijima emaligini amakhulu ase-Europe.
Uthi usengakujabulela ukudlubha ijezi lamaBhakabhaka ngolunye usuku.
Lo mdlali ngoLwesibili uhambele esikoleni ayefunda kusona, iNgazane Primary School, KwaMashu, ukuyonikela ngomfaniswano wesikole ezinganeni eziswele nangezinto zokudlala unobhutshuzwayo ngaphansi kohlelo lwakhe olubizwa ngeMasuku Legacy Foundation.
UMasuku kulolu hambo ubephelezelwa nguThamsanqa Mkhize ogijima kwiCape Town City noAndile “Carrot” Fikizolo weLamontville Golden Arrows.
Uphethe ngokuthi unesifiso sokuhambela nezikhungo ezihlala abantu asebekhulile ukuyonikela ngokuthile ngenhloso yokubuyisela emphakathini.
Uthi ulandela ezinyathelweni zikamkhulu wakhe owabe ewusizo emphakathini.