UZWANE UKHALA NGOKUSHISA KWENSIMBI KWI-DOWNS
UKHALA ngokushisa kwensimbi umdlali weMamelodi Sundowns esezinhlelweni zokubuyisa isicoco seCaf Champions League esisegabeni samaqoqo kuyona.
UThemba “Mshishi” Zwane oyisiphekepheke somdlali weDowns, utshele leli phephandaba ukuthi ubona kuzoshuba kakhulu ngesizini ezayo njengoba izophekwa ngomhluzi wenye kwiChampions League.
Imidlalo yeCaf izosongwa ngoLwezi (November) bese ngoZibandlela (December) kuqala eyesizini ezayo okulindeleke ukuba iqedwe ngoNhlaba (May) ka-2019.
Lokhu kudalwa wukuthi iCaf isihlela ukuba imiqhudelwano yayo ihambisane nekhalenda leFederation of International Football Association (Fifa) eliqala ngoNcwaba (August) liphele ngoNhlaba okwenza imidlalo yeNdebe yoMhlaba ingashayisani nemidlalo yamaligi ehlelwe ngokulandela ikhalenda (leFifa).
ISundowns seyisele yodwa emidlalweni yeCaf yanonyaka kanti kulena ezoqala ngoZibandlela izophelezelwa yi-Orlando Pirates ukumela elakuleli kwiChampions League, kuthi kwiCaf Confederations Cup kudlale iKaizer Chiefs eqede ilele isibili neFree State Stars edle ubhedu kwiNedbank Cup.
UZwane uthe: “Nakuba ikhalenda likucacisa ukuthi kuzokube kucinene utshumo ngesizini ezayo ye-Absa Premiership ngenxa yemidlalo yeCaf kodwa sizimisele ngokusibuyisa lesi sicoco sase-Afrika. Kuwumuzwa omnandi ukuba yizingqwele zalesi sicoco. Nokho kuzokuba nzima kakhulu ukumelana nayo yonke le midlalo.
“Sizosebenza kanzima ukuyicijela kahle.
"Ngiyabethemba ozakwethu ukuthi sizokwazi ukuyibamba ishisa, sifeze iphupho likaMengameli wethu lokuvelela ebholeni laseAfrika.
"Abaqeqeshi bethu bahlale beqhamuka namasu asebenzayo ukubhekana nazo zonke izinselelo esihlangabezana nazo.”
Uphethe ngokuthi unephupho lokunqoba isicoco sokuba ngumdlali ovelele kwiPremier Soccer League (PSL) ngesizini ezayo. Ngesizini edlule ubhedu ludliwe nguPercy Tau abayibamba naye kumaSandawana.
“
Kuwumuzwa omnandi ukuba yizingqwele zalesi sicoco...