Ushiswe yindodana yomqashi ngo-petrol
Umqashi uthi ukuvula icala kufana nokuthela amanzi emhlane wedada
KUNZIMA ngisho ukuhamba kowesifazane waseThafamasi, eNdwendwe, kodwa ozinze eNewlands, eThekwini, oshiswe ngophethiloli yindodana yomqashi wakhe ithi iyamdlalisa.
Usephenduke into yombhede ngenxa yokusha kanzima ezinyaweni uNkz Zinhle Mchunu (30), obesebenza enkampanini eyenza i- service yezimoto, iThe Don's esedolobheni eThekwini.
Uselahlekelwe nawumsebenzi ngenxa yalesi sigameko. Ekhuluma neLANGA, uNkz Mchunu, obehleli ekhaya ekhala ngezinhlungu, uthe ubeselungiselela ukuphuma emsebenzini, abaqashi bakhe bona sebephumile ngesikhathi ehlelwa yile nkinga.
Uveze ukuthi indodana yomqashi wakhe ingumuntu okhonze ukudlala ngesihluku, kayinqeni ukushaya umuntu ngequpha ithi iyamdlalisa. Uthi ngesikhathi kwe- nzeka lokhu, ubefake okubizwa nge- bonding ekhanda.
“Uqale wazama ukungishisa i- bonding ekhanda ngagxuma ngabaleka ngayoma phezu kwemoto ebilungiswa. Uthathe isigubhu sikapethiloli ebesibekwe phansi, wangilandela naso wangibhunyela ngawo ezinyaweni ehleka kuhle komuntu ongidlalisayo.
“Uphose uluthi lukamentshisi oluvuthayo ezinyaweni zami ngathungeleka ngomlilo kwaze kwasha ngisho imoto ebengime phezu kwayo.
“Unele wabona ukuthi ngisha kakhulu, waqala watatazela ezama ukucisha umlilo, elokhu engitshela ukuthi uyaxolisa ubethi uyangidlalisa, ubengazitsheli ukuthi ngizolimala kangaka,” kusho uNkz Mchunu.
Uthe le ndodana yomqashi wakhe imthathile yamphuthumisa esibhedlela wafike walaliswa ngenxa yokuthi ushe kakhulu.
Utshele ILANGA ukuthi ngesikhathi besendleleni, bebheke esibhedlela, ibihamba imncenga ukuba angawutsheli umndeni wakhe nabazali bayo ngoba bazoxabana nayo.
Uthe imtshele ukuthi makaqambe amanga athi ushiswe wumentshisi esephumile emsebenzini.
“Ngilale isonto lonke esibhedlela, kayikaze izihluphe nokuthi izongibheka noma ikhiphe into ezonginxephezela ngayo. Ngidlulise usuku olulodwa kwenzeke lesi sigameko, ngathumelela umphathi wami umyalezo, ngimazisa ukuthi ngilinyazwe yindodana yakhe.
“Ufone ngaleso sikhathi wangibuza ukuthi ngilivulile yini icala, uma ngingakalivuli ucela ukuba ngingawabikeli amaphoyisa ngomonakalo owenziwe yindodana yakhe,” kusho yena.
Uthe uyinyathele emsileni ngesikhathi etshela umqashi wakhe ukuthi uselivulile icala, futhi akazimisele ngokulicisha.
Utshele ILANGA ukuthi umqashi ubhoke ngolaka we hluleka nokuzibamba, wamtshela ukuthi ukuvula kwakhe icala kufana nokuthela amanzi emhlane wedada ngoba ngeke ize iboshwe indodana yakhe kwazise unabameli abakhokhelayo nyanga zonke abazokwenza ukuthi icala lakhe liphele.
Uthe lo mqashi uphinde wamtshela ukuthi ukube ubelicisha icala, ubemzombuyisela emsebenzini.
“Ngiyafisa ukuthi kwenzeke ubulungiswa kulolu daba lwami ngoba lo mqashi uvuna indodana yakhe kuyo yonke into eyenzekayo. Usola mina kukho konke lokhu okwenzekile,” kusho uNkz Mchunu.
ILANGA lishayele umqashi kaNkz Mchunu, uMnu Don Govender, ucingo lwakhe lwaphendulwa ngomunye umuntu othe usematasatasa, ucela ukubuye ashayelwe.
Esephinda ethintwa, ophendule ucingo lwakhe uthe usesibhedlela akakwazi ukukhuluma nocingo.
Okhulumela amaphoyisa KwaZulu-Natal, uCol Thembeka Mbhele, uthe likhona icala elivuliwe lokulimaza umuntu kodwa bekungakaboshwa muntu.
ILANGA likhulume noNkz Fikile Masiko we-African National Congress Women's League (ANCWL) eThekwini - okuyiyona egqugquzele uNkz Mchunu ukuba ayovula icala - uthe bazibophezele ngokumeseka.
“Sesixhumene noMnyango wezokuThuthukiswa koMphakathi KwaZulu-Natal ukuba alulekwe ngokomqondo (uNkz Mchunu)," kusho uNkz Masiko. Uthe baphinde bamhlelela nokuthi athole indawo yokuhlala njengoba ethola izincingo ezimsabisayo.
“
Uqale wazama ukungishisa i-bonding ekhanda ngagxuma ngayoma phezu kwemoto ebilungiswa. Uthathe isigubhu sikaphethiloli ebesibekwe phansi wangilandela naso...