Nohulumeni useyehluleka wukulawula ababhikishi
UBUGEBENGU nokwephulwa komthetho ngababhikishi abalimaza impahla yomphakathi, kwesinye isikhathi bavale imigwaqo ngoba befuna abaqashi noma iziphathimandla zenze lokho abakufunayo, sekufike ezingeni elethusayo ezweni.
Kuleli sonto nje, kuvalwe umgwaqo owuthelawayeka enyakatho-mpumalanga yeKwaZulu-Natal, uN2, phakathi kwamadolobhana uMtubatuba neHluhluwe, ngababhikishi abebefuna ukwakhelwa izizinda zomphakathi ezihlanganisa umtholampilo, ikamu lamaphoyisa nezindlu.
Kwenzeke okufanayo emgwaqweni omkhulu uN3, eVan Reenen’s Pass, ngesikhathi abashayeli bamaloli bevala lo mgwaqo ongomunye webaluleke kakhulu emnothweni waseNingizimu Afrika ngoba usetshenziswa nangamaloli athutha impahla esuka echwebeni laseThekwini elibangise eGauteng nasemazweni angomakhelwane bethu, njengeZimbabwe, iZambia namanye.
Cishe zonke izinsuku uma ulalele izindaba emsakazweni noma uzibuka kumabonakude, kuba nodaba olumayelana nababhikishi abashisa impahla noma bavale nemigwaqo. Lokhu sekuqala ukunika isithombe sokuthi izwe kalibuseki, nokuthi uhulumeni nezinhlaka zawo ezibhekele ukuphepha komphakathi, bayehluleka wukulawula isimo.
Kwesinye isikhathi amaphoyisa asuke ethunyelwe ukuyonqanda udlame, ayazibukela nje angenzi lutho, ababhikishi bebe becekela phansi yonke impahla yomphakathi.
Ukuthatha izintambo zombuso kukaMengameli Cyril Ramaphosa ekuqaleni kwalo nyaka, kuke kwanika ithemba lokuthi sekuntwela ezansi ngezinkinga zenkohlakalo nokwebiwa kwemali yabakhokhi bentela obekudlangile eminyakeni elishumi eyedlule.
Leli themba kodwa liya ngokushabalala ngenxa yokwephulwa komthetho isidana ezweni, kuthi labo abathintekayo kulezi zenzo bangenziwa lutho.
Imizamo kahulumeni kaMnu Ramaphosa yokunxenxa abatshalimali ukuba bakhe izimboni kuleli, ukuze kwande amathuba emisebenzi, ngeke yathela izithelo uma izwe lidunguzela, imithetho yezwe ishaywa indiva. Akekho usomabhizinisi ophusile ongatshala inkence yakhe ezweni eligcwele izinxushunxushu, lapho singekho isiqiniseko sokuthi imali yakhe iphephile, ngeke icwile ngenxa yezizathu zokungalawuleki kwezwe.
Abaningi kuleli bavame ukuziqhayisa ngokuthi sinomthethosisekelo ovikela amalungelo abantu ukuba babhikishe ngokukhululeka, bangaphanzanyiswa ngamaphoyisa.
Yebo lokhu kuhle, kodwa kakusho ukuthi abantu mabenze umathanda uma bebhikisha, bahlukumeze namalungelo abanye abangangene ezinkingeni ababhikishi abasuke bekhala ngazo. Kufanele sifunde ukuhloniphana bakwethu, abanezikhalo bazizwakalise ngokuthula, bangenzi izinto ezizophazamisa abanye abantu.
Uhulumeni kazwelonke kuzofanele uqinise isandla, amaphoyisa ayalelwe ukuba alwe nokwephulwa komthetho okudlangile ezweni. Ngeke silakhe izwe uma imithetho yezwe ingahlonishwa, kuthi nokwakhiwayo kubhidlizwe ngabantu abangenangqondo.