Ithuba lokugcina kwi-VDJ kuKannemeyer
NGOLWESIBILI kuqalile ukukalwa kwezisindo ezizothwalwa ngamahhashi azokube egabadula emjahweni omkhulukazi, iVodacom Durban July yanonyaka ezokuba mhla ka-7 Julayi 2018 eGreyville Racecourse.
Akubanga khona okusha njengoba uCoral Fever kunguyena ozothwala isisindo esiphezulu sika-60kg njengoba bekulindelekile.
Babili kuphela ojokhi abasaqinisekisiwe kulesi sigaba, okunguPiere Strydom ozogibela uAbashiri noJeff Lloyd ozoqhoqhobala uMade To Conquer.
Sekuyinto eyaziwayo ukuthi uMuzi Yeni okungomunye wojokhi bebala elimnyama abazakhele igama kulo mdlalo uzokube egibele uCoral Fever onqobe iPremier Champions Cup.
Amahhashi okugcina azobonakala kwi-VDJ nemizila azobekwa kuyona azomenyezelwa ngoLwesibili lomhla ka 26 Juni, ngakho-ke lisekhona ithuba lokuba namanye amahhashi azibonakalise kulabo abazokube beqoka uhlu lokugcina. Amahhashi azothola ithuba lokugcina lokuzibonakalisa emijahweni emibili ezokuba seScottsville ngoMgqibelo, iTrack & Ball Derby neTrack And Ball Oaks.
Phakathi kuka-It’s My Turn coma uThe Slade wesitebela sikaDean Kannemeyer, kumele kube khona onqobayo emjahweni iTrack & Ball Derby ngoMgqibelo uma la mahhashi efisa ukuzibeka ethubeni lokugijima kwiVDJ njengoba womabili esengcupheni yokusala ngaphandle.
u-It’s My Turn uzoba nethuba elingcono lokungenela iVDJ uma enqoba kanti uThe Slade yena usazoqhubeka nokuba sengcupheni ngaphandle uma ewine ngegebe elikhulu elizoshiya ithimba eliqokayo nezingqapheli zih- labeke umxhwele.
Nokho-ke angeke kube lula ukunqoba kula mahhasi njengoba ezobe ebhekene no-American Landing owine i-EP Derby.
Crawford
Leli hhashi eliqeqeshwa nguBrett Crawford lasuka kude le emsileni kowe-EP Derby laze layoshaya intambo, liwashiya ngegebe elide amanye amahhashi.
uCrawford akazange aliphakamise leli hhashi ukungenela iVDJ kodwa wethembele kakhulu kuWhite River okuyilona kuphela ihhashi angenele ngalo lo mjaho omkhulukazi.
u-Anton Marcus, ophuke isihlakala ngesikhathi ewa egibele uWhite River esiyingini sokuzifudumeza ngaphambi kokuqala kweDaisy Guineas, uzobe egibela okokuqala selokhu alimala njengoba ezoqhoqhobala u-It’s My Turn kaKanemeyer, okuzocacisa ukuthi ngabe lo mqeqeshi unalo yini ihhashi emjahweni weVDJ noma cha.
u-It’s My Turn uthishwa ukubathela ngezintuli o-American Landing noThe Slade.
Kowe-Track & Ball Oaks, nguFlichity By Farr ongenele iVDJ kanti naye, njengabo o-It’s My Turn noThe Slade, kuzomele ukuba anqobe uma ezokuba nethuba lokuba tyingxenye yamahhashi eVDJ. Ugijime kahle kakhulu kwiSA Oaks ebiseTurffontein elandela ngemuva uSecret Portion ngakho ubonakala enable ithuba. Nokhoke, uzobhekana nomqansa njengoba ezobhekana nomqansa njengoba ezokube encintisana namahhashi amaningi amadaka futhi asefomini.
uRoyal Utopia
uRoyal Utopia ulale isibili kwiEast Coast Handicap ngemuva kukaNganga, okungelinye lamahhashi angenele iVDJ, kwathi uGirl On The Run bamshiya kancane ebangeni lika-2 600m eTurffontein ekuqaleni kale nyanga kanti naye uphuma esitebeleni esisefomini enkulu.
Kwi-Track & Ball Oaks kulindeleke ukuba kunqobe uRoyal Utopia elandelwa ngu-Flichity By Farr noLady Li Lay.