ISILO SIFUNA UKUGUBHA NESIZWE SASO
SIZOGUBHA usuku lwaso lokuzalwa noZulu wonkana iSilo uZwelithini kaBhekuzulu njengoba sesihlabe ikhwelo lokuba isizwe sonke siphelele oNdini ngenhloso yokuba sikhulume ngezinto eziningi ezithinta sona isizwe.
Sizobe sibhoboka ngezinto ezithinta isizwe samaZulu kulo mcimbi ozokuba senkundleni yemidlalo yasoNdini mhla ka-4 kuNtulikazi (July).
Okhulumela iNdlunkulu, uMntwana uThulani Zulu, uthe iSilo ngeke sishiye ngaphandle isizwe saso uma sigubha iminyaka ewu-70 yobudala newu-46 sihleli esihlalweni.
Uthe okunye okuzobe kuseqhulwin, wukuba kukhunjulwe usuku lapho amaNgisi abuyela oNdini kwashiswa isigodlo seSilo uCetshwayo mhla zizine kuNtulikazi ka-1879.
“Umlando yiwona obaluleke kakhulu ukuze nentsha ekhulayo ikuqonde kahle kamhlophe okwakwenzeka eminyakeni edlule. Kule mbizo kuzoqalwa ngomgubho omkhulu sikhumbule umonakalo owenziwa ngamaNgisi bese kulandela nokugubha le minyaka yeMbube iqhwakele esihlalweni,” kusho uMntwana uThulani.
Ngokusho kwendlunkulu, le mbizo ebizwa ngokuthi “Ngangezwe”, kakukhethiwe ubulili kubantu abazobe bekhona, kodwa iSilo sicela wonke uZulu aphelele khona. Ithi isizwe kumele sikuqonde ukuthi iSilo siyafisa ukuhlangana naso ukuze kubhekwe ngasolinye okuqhubekayo KwaZulu-Natal.
"Kasiyazi yonke inkulumo yeSilo, kodwa sona sizobe sizikhulumela ngqo nomphakathi, yingakho sithi bonke abantu mabaphelele bayozizwela,” kusho uMntwana uThulani.
"Kuzokhumbuleka ukuthi indaba eluma kabuhlungu kubantu abaningi bakulesi sifundazwe ikakhulukazi amakhosi naso iSilo - okucacayo wukuthi ngeke isale kulo mcimbi, ngeyesiphakamiso sokuba kuqedwe iNgonyama Trust eyengamele umhlaba ongaphansi kwamakhosi.
ISilo yisona esingumnikazi walo mhlaba. Lesi siphakamiso sikhishwe yithimba ebeliholwa nguMnu Kgalema Motlanthe, kuyimanje iSilo sithi sifuna ukuhlangana noMengameli Cyril Ramaphosa badingide lolu daba.