Izongenisa izizumbulu zemali iVDJ
Bathi ukugcwala kwezivakashi eThekwini eziza emcimbini kuvula namathuba emisebenzi
KULINDELEKE ukuba kungene izigidi ezilinganiselwa ku-R150 million emnothweni weKwaZulu-Natal ngomjaho wamahhashi omkhulukazi eNingizimu Afrika, iVodacom Durban July (VDJ), ozoba seGreyville Racecourse ngoMgqibelo.
Yize le nzuzo yehle kakhulu uma iqhathaniswa neyango-2014, obekuwu-R425 million, isikhulu seTourism KwaZulu-Natal (TKZN), uNkz Phindile Makwakwa, sithi lo mcimbi ubaluleke kakhulu ekuthuthukiseni umnotho weTheku neKwaZulu-Natal yonkana kanti beyiTourism KZN, bazoqinisekisa ukuthi abahambele lo mcimbi baphathiswa okwezitatanyiswa.
“IVodacom Durban July akusewona umcimbi omayelana nomjaho namahhashi kuphela, kodwa uhlanganisa abaholi bepolitiki, abezimboni ezahlukene nabathandi bobumnandi, yingakho sinesifiso sokuba ngelinye ilanga ube sezingeni eliqhathaniswa nemicimbi emikhulu yaphesheya, okubalwa kuyona iMelbourne Cup.
"Singaba sezingeni lokusingatha umcimbi waleli zinga ngoba sinesimo sezulu esihlale sisihle, sinezingqalasizinda eziseqophelweni eliphezulu, inqobo nje uma sizoqikelela ukuthi zihlale zinakekelekile,” kusho yena.
IMeya yeTheku, uNkk Zandile Gumede, ithe konke kumi ngomumo futhi bewumasipala bayazigqaja kakhulu ngamalungiselelo. “Okunye okusijabulisayo wukufukuleka komnotho weTheku neKwaZulu-Natal yonkana njengoba sizwile ukuthi amahhotela amaningi asegcwele, okusho ukuthi ilinganiselwa ku-R75-million imali echithwe kuwona nje kuphela,” kusho yena.
Ithe iningi imali eshiywa yizihambeli zalo mcimbi ngoba umuntu ngamunye uchitha imali ekhokhela ihhotela, ibhanoyi, izindawo zikaqedisizungu kuye kuyokapakela nakwezokuthutha.
Ngaphezu kwalokho, kuvuleka namathuba emisebenzi. Imeya ithe ilinganiselwa kusukela ku-R5,877 imali engasetshenziswa ngumuntu ngamunye ngosuku, impelasonto yonke. “Ngale nje kokugcwala kwamahhotela, siyajabula ukuthi kuzofukuleka nomnotho wasemalokishini njengoba ziziningi izindawo zakhona ezihlelelwe imicimbi eyahlukene ehambisana neVDJ,” kusho imeya. I-Marketing Manager yakwaGold Circle, uMnu Ken Tweddell, ithe ngosuku lomjaho kulindeleke ukuba izihambeli zisebenzise imali elinganiselwa ku-R75 million, kanti uma sekuhlanganiswa nokusuke kubhejelwa ngayo amahhashi, ingalinganiselwa ku- R100-million.
Echaza ngengqikithi yalo nyaka, ethi “It Is Time” umsiki wengqephu waseThekwini, uNolitha Baam, uthe: “Le ngqikithi ihambisana kakhulu nesikhathi samanje, sokuphilela imanje noma ngabe ukumuphi umkhakha. Le ngqikithi isenza sibuyele esikhathini esedlule, sibheke ukuthi yini esiyifundile esizoyixoxa ngemisiko esizoyenza manje.” Uthe yena uzobonakala etendeni leTourism KZN njengoba lizobe linabathandi nabasiki bengqephu nabagqugquzeli, okuyiKZN Fashion Council.
I-hashtag yakulo nyaka yalo mcimbi, ithi: #VDJ2018.