UFELE IJEZI WANQUNYWA UQHOQHOQHO
UYAVEVA yintukuthelo umphakathi waseMgwanini, eMdletsheni, eHluhluwe ngenxa yowesilisa okubikwa ukuthi unqume omunye umqala ngommese washona kubangwa ijezi lokugqoka.
Kubikwa ukuthi uThulani “Mkhuze” Fakude (19), ubulawe ngowesilisa - esiligodlile igama lakhe - axabane naye ngoba efuna ijezi abeliboleke umsolwa.
Kuvela ukuthi uThulani - okuthiwa ubefunda uGrade 9 eSiphosabadletshe High School - ubuze ijezi lakhe, wathi sekunesikhathi eside lingabuyi kumsolwa kwaba wukusuka kwengxabano njalo.
Umthombo osondelene nalolu daba, uthi umsolwa ubeselidayisile ijezi wathi uzolikhokha uma esethole imali, okuyikhona okucasule uThulani wadedela inqindi.
“Bashayanile okuthe uma uThulani esengaphansi, lona wakhipha ummese wamdabula uqhoqhoqho kwaphela kanjalo ngaye. Ushonele khona lapho.
"Umphakathi uzamile ukumhubha umsolwa kodwa wabaleka wagcwala amathafa. Kube yisimo esibi kakhulu ngoba laba bantu bakhelene emakhaya futhi bebejwayelene kakhulu,” kusho umthombo.
Kuthiwa umufi nomsolwa isikhathi esiningi bebesichitha ndawonye, akukho obekukhombisa ukuthi bangaze balimazane.
Imizamo yokuthola umndeni oshonelwe kayiphumelelanga, okamsolwa kawuthandanga ukukhuluma.
UMnu Dodile Shongwe, oyilungu lekomidi elibhekela ezokuphepha ku-Ward 7 lapho kwenzeke khona lesi sigameko, uthi bayakuqala ukubona isihluku esifana nalesi endaweni.
Okhulumela amaphoyisa KwaZulu-Natal, uCapt Nqobile Gwala, uthe umsolwa uboshiwe kanti kulindeleke ukuba avele eNkantolo yeMantshi yaseHluhluwe namhlanje ngoLwesine.
"Amaphoyisa amthungathe aze amthola umsolwa oneminyaka ewu-35 mayelana nezinsolo zokubulala owesilisa amsike ngommese emqaleni," kusho uCapt uGwala.