KUSALE UBUCWEBE EGWETSHWA
KUSALE phansi umswenko nobucwebe abeziphihle ngabo uThamsanqa Njisane (39), emuva kokugwetshwa yiJaji Kate Pillay, eNkantolo eNkulu yaseThekwini, ngoMsombuluko.
Le nkantolo igixabeze uThamsanqa ngeminyaka ewu-20 engaliboni ilanga ngecala lokubulala uMnu Johannes Sekoati, obengumphathi wakhe kuMasipala weTheku, mhla ka-3 kuNhlolanja (February) ngo2015.
Ngosuku lwesigameko, umufi ubesemotweni yakhe iToyota Tazz ebomvu, ekhoneni lomgwaqo uNkathazo noSomlandela eNanda, eThekwini, ngesikhathi kufika uThamsanqa ehamba ngeVW yakhe esasiliva ngokumpunga ( silver grey), wama phambi kwemoto kamufi.
Uphume emotweni yakhe waqonda kumufi wavulela ngentululwane yezinhlamvu, washonela endaweni yesigameko.
UMnu Sekoati ubulawa nje, bekulindeleke ukuba abengufakazi esigcawini sokuqondisa izigwegwe ecaleni likaThamsanqa emsebenzini.
Njengoba bekuqulwa icala enkantolo, uThamsanqa ubefika enkantolo eswenkile.
Kuse ngokunye ngesikhathi ijaji limgweba njengoba ubengumuntu ozipholele futhi engatshengisi ukuzisola ngakwenzile.
Ijaji limtshele ukuthi ubulale uMnu Sekoati ngesihluku njengoba emdubule amahlandla ayisihlanu ekhanda nasesifubeni.
“Isenzo sakho sobulwane sishiye izingane zingenayise. Ngesikhathi umdubula kawushongo lutho kuyena uvele wavulela ngenhlamvu. Isibhamu obulele ngaso umufi kasitholakalanga. Wenze umsebenzi wenkantolo waba lukhuni njengoba ungangenanga ebhokisini lofakazi uzoziphendulela, ukhethe ukuthula ungasho lutho,” ku-sho iJaji Pillay.
Lithe umbuso wehlulekile wukuveza ukuthi ubukuhlelile ukubulala umufi ngakho-ke inkantolo ngeke imgixabeze ngodilikajele.
“Ufanelwe yiminyaka ewu-20 ubhadla ejele,” kusho ijaji. phumelela@ilanganews. co.za