ZIHLINZEKE KWI-VDJ
ISIZE yafika impelasonto yeVodacom Durban July (VDJ) ebhekwe ngabomvu ikakhulukazi kulabo abathanda impilo yesitayela, imfashini, wukudla okuphambili namahhashi.
Lo mcimbi uzobe useGreyville Racecourse, eThekwini ngoMgqibelo, wenzeka ihlandla lesi-121. Kulindeleke ukuba uhehe izihambeli ezilinganiselwa ku-50 000, ngokusho kwe-website i-www. vodacomdurbanjuly.co.za.
Kuvamile-ke ukuthi uma kulungiselwa imicimbi yaleli zinga kube nesiphithiphithi kwazise kusuke kukuningi okumele kwenziwe. ILANGA lixoxe noRethabile Mendu, oyi-blogger ukuzwa ukuthi yini okumele izihambeli ziyiqikelele nangosuku lwalo mcimbi.
Amathikithi Okungena: Qikelela ukuthi amathikithi uwalanda ngesikhathi eComputicket. Okumele ukwazi wukuthi amathikithi okungena esangweni lapho kugijima khona amahhashi kawahlangene nawalapho kuklele khona amatende ezobumnandi nokudla. Uma ufisa ukuyozibandakanya nosaziwayo ematendeni (marquees) kumele ube namathikithi akhona.
Amathikithi okupaka noma imoto ezokuthutha ikubeke emjahweni: Uma ufisa ukupaka ngaphakathi, kumele uthenge ithikithi emahhovisi akhona eGreyville, ku-Avondale Road noma ubathinte ngocingo ku: (031) 314-1631 ngokushesha ngoba kungenzeka ukuthi kumanje asephelile.
Phatha imali: Awukho umcimbi ongaya kuwona ungazihlinzekile ngemali. Uyayidinga imali yokubheja, ukudla, iziphuzo nokunye.
I-Powebank charger: Siphila ezikhathini zokuthanda ukushutha nama-selfie. Ngaphandle kwalokho, umcimbi usuke ungaphelele uma singaziboni izithombe. Lo mcimbi imvamisa uthatha usuku lonke, kasingabazi ukuthi i-battery izogcina iphelile umatasa u-posta okwenzekayo ezinkundleni zokuxhumana.
Akekho ozoba nesikhathi sokugada ucingo lwakho uma usacharger ngakho kuhle ukuzihlinzeka nge-power bank.
Bheja phela: Yebo kuyelwa ubumnandi, imfashini, ukudla nokungcebeleka nosaziwayo, kodwa ungakhohlwa wukufunda okusha nokulandela ingqikithi yosuku. Kuhle ukubheja kusenesikhathi ngoba imigqa iba mide kakhulu ungaze uphelelwe yisineke umcimbi ungakaqali. Zihlinzeke nge-coat esesitayeleni UNtulikazi yinyanga eba nesimo sezulu esingaqondakali yize iTheku laziwa njengendawo efudumele. Kubalulekile ukuzihlinzeka ngebhantshi elisemgangathweni, elizohambisana nomswenko wakho wasemini.
Isicathulo esiyi-wedge: Ave ebukeka kahle umuntu wesifazane ogqoke i-stiletto, kodwa zicabangele ukuthi usazohamba ibangana uzulazula ngaphakathi, okungenzeka futhi isikhathi esiningi usichithe umile. Faka esikhwameni isicathulo esiyi-wedge esingeke siphume kakhulu emswenkweni wakho.
Phatha i-tissue: Ezindaweni ezinabantu abaningi iyaphela i-toilet paper ema-toilet. Yiba neyakho, ungaceli kubantu.