BADUMELE KWESULA UMPHATHI
IZIMISELE ngokuqinisekisa ukuthi konke kuhamba kahle mayelana nokuqashwa komphathi omusha i-University of KwaZuluNatal emuva kokuba kuthe ngesonto eledlule kwesula obesiphethe, uDkt Albert Van Jaarsveld.
Usihlalo womkhandlu wenyuvesi, uDkt Vukile Mehana, uthi umkhandlu uzohlala ucubungule mayelana nalesi sikhundla ukuze inyuvesi igcinwe iseqophelweni eliphezulu.
UDkt Van Jaarsveld osule kukhalwa kule nyuvesi, uzwakalise ukuthi usethole amadlelo aluhlaza e-Australia, lapho eseyokuba ngumqondisi e-International Institute for Applied System Analysis (IISA).
Uthathe izintambo kule nyuvesi mhla ka-2 kuNhlolanja (February) 2015 kanti ngaphambi kokuba aphathe e-UKZN, ubekade eyisikhulu esiphezulu esikhungweni socwaningo, iNational Research Foundation.
Inyuvesi izomemezela ngokuphela kukaMfumfu (October) ukuthi ngubani ozobamba njengoba uhlelo lokuqasha luthatha isikhathi eside.
Okhulumela i-UKZN, uNkz Normah Zondo, uthe inyuvesi izwakalisa ukudumala ngokwesula emsebenzini komphathi wayo okulindeleke ukuba agcine ekupheleni kukaMandulo (September) nonyaka. Uthi uDkt Van Jaarsveld ubambe iqhaza elikhulu ekusungulweni kwezinhlelo ezintsha ezisize kakhulu abafundi.
“Isigungu senyuvesi siyabonga kakhulu ngeqhaza lakhe ekuqinisekiseni ukuba zonke izinto zihamba ngendlela efanele. Simfisela okuhle kuzona zonke izifiso zakhe kanjalo nezinhlelo,” kusho uNkz Zondo.
UDkt Van Jaarsveld ngaphambi kokuba afike kule nyuvesi, ubesebenza kakhulu kwezocwaningo lwezemfundo e-University of Pretoria, eStellenbosch University naseDarmouth College e-United States of America. Ngakolunye uhlangothi, i-University of Cape Town, yemukele isekela leshansela elisha uSolwazi Mamokgethi Phakeng, Inkontileka yakhe eqale ukusebenza ngeSonto, emuva kokusula kukaDkt Max Price.