IKHULUNYELWA PHANSI EYEMIBUTHANO YE-EFF
IKHULUNYELWA phansi eyokuhlala kwezingqungquthela zokuqoka ubuholi be-EFF ezifundeni eziwu-5 KwaZulu-Natal, okulindeleke ukuba ibe ngeSonto. Ngokuthola kweLA
lezi zingqungquthela - ezibizwa ngokuthi yimihlangano - zimi kanje; kukhona eseMtubatuba Town Hall, eMkhanyakude; ehholo lomphakathi eNewcastle; ehholo lomphakathi eRichards Bay, eKing Cetshwayo; eMgungundlovu naseThekwini silobe zingakaqinisekiswa izindawo.
Ngokusho komthombo ongaphakathi kuleli qembu, konke sekumi ngomumo.
“Phela thina siyaqala ukuba nengqungquthela yokukhetha ubuholi, sitshelwe ukuthi izothatha usuku olulodwa, okusho ukuthi sizofike sifundelwe imithetho nendlela okuzovotwa ngayo.
“Liyothi lithambama kuyobe sekucacile ukuthi ngobani abazohola izifunda kulezi eziwu-5. Nakuba sibona sengathi kungase kube nezithiyo, kodwa sikholwa wukuthi ingqugquthela izohamba kahle kakhulu,” kusho umthombo.
UNkk Reneiloe Mashabela oyibamba likanobhala we-EFF KwaZulu-Natal, uthe nakuba ikhona futhi iyiqiniso indaba yokuhlala kwezingqungquthela zokukhetha ubuholi, kodwa ngeke bemukelwe abezindaba futhi bazofihlelwa izindawo ezizoba kuzona.
Ebuzwa ngezizathu zokungafunwa kwabezindaba, wenyukelwe wumoya.
“Wena ukuthathaphi ukuthi kuzoba nezingqungquthela kulezi zindawo ngeSonto? Ukube siyabadinga abezindaba ngabe kudala sazikhipha izimemo zokuba babe khona.
“Ikhona imihlangano ezoba ngeSonto kodwa eyamalungu enhlangano kuphela,” kusho uNkk Mashabela maqede wavala ucingo lwakhe.