Oshaye isidudla wazidubula
Kuthiwa babe nokuhilizisana bebanga inkokhelo
UBEYITHEMBA lomndeni owesifazane obulawe ngowokufika okusabalale i- video yakhe edubula kwa-V, eMlazi ngeSonto ekuseni, wagcina ngokuzingqokloza ngenhlamvu wafa.
UNkz Cacisile Gumede (34), waseCato Ridge, obengumabhalane eMsunduzi Clinic, eCato Ridge, kunezinsolo eziqinile zokuthi ubulawe nguMnu Sdu Sitole naye ogcine ngokuzibulala.
Kuthiwa uMnu Sitole, ubemakhela indlu baba nokuhilizisana bebanga inkokhelo. Ngokuthola kweLANGA, ngosuku afe ngalo uNkz Gumede, kufike uMnu Sitole kubo eyobasela isi-kweletu.
Umbizele emnyango bakhuluma, kwezwakala sekuqhuma isibhamu. Kuthe uma odadewabo kaNkz Gumede bephuma, bamfica esedindilizile, uMnu Sitole esephuma ngemoto ebaleka.
ILANGA linikele kubo kaNkz Gumede ngoLwesibili, lafica umndeni uhleli emakhandleleni, kukhona nabahlengikazi abebesebenza nomufi beyobhonga emswaneni.
Unina kaNkz Gumede - walile ukukhuluma neLANGA, okwenze kwabanzima ukuthola igama lakhe - uNkk MaMthethwa Gumede, ekhuluma nalaba bahlengikazi uthe ulahlekelwe ngokubulawa kwendodakazi yakhe ngesihluku esinjena.
“Ngiphelelwa ngamazwi, lo mntanami nguye obeyikhanda lalo mndeni. Yonke le nto eniyibona la nguyena obephusha laba bakwabo, ebatshela ukuthi masenze lokhu, kwenzeke. Ngilahlekelwe kakhulu,” kusho uNkk Gumede.
Kuthe uma ILANGA lizethula, wavele washintsha emoyeni, wangafuna ukukhuluma nalo. Uthe ngeke akhulume lutho ngoba lesi sigameko senzeke yena engekho.
Ucele kubizwe amadodakazi akhe abekhona ngosuku lwesigameko, ebuza nokuthi kuyosiza ngani ukubhalwa kodaba ngoba ngeke isavuka indodakazi yakhe.
Amadodakazi athe umfowabo obaphethe, uMnu Mdu Ntuli, ubavalile wathi mabangakhulumi lutho kwabezindaba ngakho ngeke bona bakwazi ukukhuluma.
Omakhelwane bebelokhu bengena bephuma kulo mndeni beyobabaza umhlola ngokwenzekile. Omunye umakhelwane ozithele phezu kweLANGA esayongena kwaGumede - igama la- khe esiligodlile - ulitshele ukuthi owesilisa obulele uNkz Gumede nguyena obemakhela indlu, esho ekhomba indlu engakafulelwa esegcekeni lakwaGumede.
“Lo mlisa ufike ngezithuba zehora lesithupha ntambama ehamba ngemoto eyigalofu. Kuthiwa ungene uNkz Gumede ehleli ekhishini nodadewabo wase ecela ukuba bakhulume ngaphandle.
“Kakuphelanga sikhathi esingakanani bexoxa, abasendlini bezwa sekuqhuma isibhamu. Odadewabo baphume esedindilize uCacisile, eseshonile.
“Sibuhlungu sonke ngokubulawa kwalo mntwana ngoba ubelungile. Besingakaze sizwe kuthiwa uxabene nomuntu,” kusho lo makhelwane.
Ozakwabo bakaNkz Gumede bathi ubengumuntu okhuthele futhi ewuthanda umsebenzi wa- khe. Izolo ngoLwesithathu, uNgqongqoshe wezeMpilo KwaZulu-Natal, uDkt Sbongiseni Dhlomo, uhambele lo mndeni eyobhonga emswaneni.
Umfowabo kaMnu Sitole, uMnu Joao Sitole, uthe besebezwile ukuthi umfowabo ngaphambi kokuba azidubule, uqale wayodubula owesifazane abemakhela indlu.
“Mina ulwazi lokuthi yimalini abebekweletana yona, kanginalo. Engikwaziyo wukuthi uke wasebenza eCato Ridge kodwa ubengahambi nami njengoba nathi besiye simlekelele.
“Kasazi ukuthi ubengenwe yini ngempela aze enze umonakalo ongaka. Akazange ayikhulume kithina siwumndeni eyokuthi ukweletwa ngowesifazane futhi usecabanga ukumbulala.
“Besizomkhuza sithi okungcono ayombika emaphoyiseni hhayi ukuba amlimaze,” kusho uMnu Sitole.
UNkz Gumede uzofihlwa ngoSonto, inkonzo yesikhumbuzo sakhe izoba namhlanje ngoLwesine, khona eCato Ridge.
Ushiye emhlabeni abantwana bakhe ababili oneminyaka ewu12 nonewu-7. UMnu Sitole kulindeleke ukuba isidumbu sakhe sihambe ngoMgqibelo silibhekise kwelakubo eMozambique, bese efihlwa ngeSonto.
Okhulumela amaphoyisa KwaZulu-Natal, uCapt Nqobile Gwala, uthi amaphoyisa ase-Msunduzi aphenya icala lokubulala owesifazane. Ukuqiniseki-sile ukuthi umsolwa ngowesilisa ozigqokloze ngesibhamu kwa-V, eMlazi.
Kakuphelanga sikhathi esingakanani bexoxa, abasendlini bezwa kuqhuma isibhamu...