IZOKHONJISWA BUKHOMA KWI-SUPERSPORT I-VDJ
AMAPHANTA angenawo amathikithi okuyobuka bukhoma enkundleni amahhashi egabavula kwiVodacom Durban July kumele ehlise imimoya kwazise lo mjaho uzokhonjiswa ukusuka nokuhlala okokuqala ngqa esiteshini sikamabonakude esingenisa ngamandla kwezemidlalo, iSuperSport.
Abagqugquzeli beVDJ nabakwa-SuperSport basayinde isivumelwano sokusebenzisana seminyaka emithathu.
USandile Luthuli wakwaSuperSport obehambele emahhovisi eLANGA izolo uzwakalise ukuthi bajabule kakhulu ngokuba yingxenye yalo mjaho obalwa nemikhulukazi e-Afrika.
“Okuhle ngalesi sivumelwano wukuthi sizonika lo mjaho ithuba lokukhangiseka nasemazweni angaphandle kwazise sitholakala emazweni ehlukene,” kusho uLuthuli obehambisana noVera Vencatasamy wakwaMedia Link esebenzisana nabo KwaZuluNatal.
Bavumelana ngokuthi lo mjaho kakuyona indawo lapho kuhlangana amaphanta nje kuphela kodwa uhlanganisa abantu bemikhakha eyahlukene ukuzojabula.
UGideon Khobane oyisikhulu esiphezulu sakwaSuperSport, uthe: “ISuperSport izizwa ithobeke kakhulu ngalesi sivumelwano esizozuzisa okuningi zombili izinhlangothi.”
ISuperSport izothula lo mjaho amahora amathathu kusuka ngo13h30 kwiSuperSport 4 kanti enkundleni izokube ibophele umethuli wayo wezinhlelo osemn-kantshubomvu uNeil Andrews, ozokube ehambisana nojokhi osenqobe lo mjaho amahlandla amane, u-Anthony Delpech. Umjaho omkhulu uzoboniswa bukhoma ngo-16h20 kwiSS10 HD.