BAYOTHEKELA ULWAZI E-PORTUGAL ABE-KZN ACADEMY
LIZOHOLWA nguMbongeleni Shibe ithimba leKZN Academy labadlali abangu-18 abazohamba bayothekela ulwazi ePortugal.
Abadlali balesi sikhungo bazofulathela elakuleli mhla ka-13 babuye mhla ka-29 kwephezulu, kanti bethulelwe abezindaba izolo ngoLwesithathu ekuseni eMarine Parade, eNorth Beach, eThekwini.
Kulolu hambo iSouth African Football Association (Safa) izomelwa nguShibe oyilungu lesigungu sikazwelonke. UShibe uphinde abe nguMengameli weSafa uGu Region. ISafa bekumele imelwe nguKwenzakwakhe Ngwenya onguSihlalo weSafa KwaZuluNatal, kodwa waphazanyiswa wukuthi isifundazwe sizokube sisingethe imidlalo kazwelonke yeSAB League. Le midlalo izoqala mhla ka-16 kwephezulu isongwe mhla ka-22 eKing Zwelithini Stadium, eMlazi.
UShibe ubekhona emcimbini wayizolo, futhi wakuqinisekisa ukuthi nguyena ozomela iSafa kulolu hambo. Abadlali baqhamuka ezindaweni ezahlukene zaKwaZulu-Natal, kanti okuhle ngabo wukuthi yize bengabe-U/19 kodwa kukhona ngisho abaneminyaka engu-14 nengu-15 ubudala.
UMazwi Mkhize weSafa, uyale abadlali ukuba bangasikhohlwa isikole. Uncome i-Academy ngokuqinisekisa ukuthi isebenza ngabadlali beminyaka eqondile. Kulo mcimbi kutuswe kakhulu uGugu Marawa ngokuqhamuka namasu okuthuthukisa lesi sikhungo ngemuva kokubhuntsha kweDurban U/19 International Tournament.
IKZN Academy ihlelelwe imidlalo eyahlukene nezikwati zamakilabhu amakhulu asePortugal. Izokube ilolongwa nguSboniso Vilakazi odidiyele abadlali abayisithupha ethimbeni abehambe nalo ngonyaka odlule ukuya ePortugal naseSpain. Iminyaka yabo yobudala isabavumela ukuba badlale esikwatini sika-U/19 nonyaka.