Uphenduke isangoma esingayidli imbumba
Kusahamba ngamagama kaNeymar kwiNdebe yoMhlaba
UNEYMAR oyisilomo seBrazil uphenduke isangoma esingayidli imbumba njengoba elibeke ngembaba elokuthi ngeke bagqame uLionel Messi wase-Argentina noCristiano Ronaldo wasePortugal kwiNdebe yoMhlaba eqhubeka eRussia.
Amehlo omhlaba asethe njo kuNeymar kwiNdebe yoMhlaba ngemuva kokuphuma kwe-Argentina nePortugal esigabeni sika- last 16 ngokwahlukana.
IBrazil izodudulana neBelgium emdlalweni we- quarter final ozokuba kusasa ngoLwesihlanu ngo20h00.
Lo mdlalo yiwona obhekwe kakhulu kulesi sigaba njengoba la mazwe edlala ibhola elisezingeni eliphezulu. Abahlaziyi abaningi beNdebe yoMhlaba, bavumelana ngokuthi ozonqoba kulo mdlalo, uzokudla ubhedu kulo mqhudelwano.
Ngaphambi kokuqala kweNdebe yoMhlaba, uNeymar ushilo ukuthi akukho simanga esizokwe- nziwa nguMessi noRonaldo. Nokho-ke walile ukusho izizathu zokweseka umbono wakhe.
Uthe abadlali abazogqama ubona kuzokuba nguPhilippe Coutinho, uGabriel Jesus abangomkhaya bakhe, uKevin De Bruyne no-Eden Hazard baseBelgium noLuis Suarez wase-Uruguay.
Okuqaphelekayo wukuthi bonke abadlali abaqagulwe nguNeymar, amazwe abo asekhona kwiNdebe yoMhlaba. Uthe uMohamed Salah wase-Egypt naye akukho okutheni azokwenza ngoba uzalwa ezweni elingaphili ngebhola.
USalah ube neshwa njengoba elimale kowamanqamu we-Uefa Champions League ikilabhu yakhe iLiverpool ihlulwa yiReal Madrid ngo-3-1 emasontweni ambalwa edlule. Lokhu kuphoqe ukuba angawudlali umdlalo wokuqala we-Egypt kwiNdebe yoMhlaba abahlulwe kuwona yi-Uruguay ngo-1-0.
IBrazil inenebule iMexico ngo2-0 ukuzibekisela indawo kuma- quarter- final.
IBelgium ithele muva njengembumba ihlula iJapan ngo-3-2 esigabeni sika-last 16. IJapan izenzele phansi ihuqa ubuthongo emuva ekubeni ibihamba phambili ngo-20 esiwombeni sesibili.
Ukuvuza kweBelgium emuva, kubukeka kuzoyiqhatha neBrazil esikhombise kaningi ukuthi kayiyishalazeli inethi.
Ngaphezu kwalokhu, akubukeki iBelgium izothola inqwaba yamathuba okuvalela amagoli azokweletisa iBrazil njengoba iwukhonkolo emuva.
Isiyonke imidlalo yesigaba samaQuarter Final yeNdebe yoMhlaba imi kanjena: KUSASA NGOLWESIHLANU Uruguay vs France 16h00 (SS3/ SABC1).
Brazil vs Belgium 20h00 (SS3/ SABC 1). NGOMGQIBELO Sweden vs England 16h00 (SS3/ SABC1).
Croatia vs Russia 20h00 (SS3/ SABC1).